અમરેલીઃ તેલનું ટેન્કર પલ્ટી જતાં લોકો ડોલ, ડબ્બો જે મળ્યું તે લઈને ભરવા દોડ્યા- Video

લોકોમાં તેલ લેવા દોડ લાગી
અમરેલીના બગસર ધારી હાઈવે પરના હામ્પુર ગામ પાસે જુનાગઢથી પીપાવાવ તરફ આજે એક ટેન્કર જઈ રહ્યું હતું. જે ટેન્કરમાં તેલ ભરેલું હતું. આ તેલનું ટેન્કર રસ્તા પર અકસ્માતને પગલે પલ્ટી ખાઈ જતા તેલની રેલમછેલ થઈ ગઈ હતી. હાલમાં સિંગતેલનો ભાવ આસમાને છે અને પાછું દિવાળી છે. જેને પગલે લોકોમાં આ તેલને ભરી લેવા માટે રીતસરની દોટ લાગી હતી. લોકો ડોલ, તપેલા, હાંડી, બરણી, ઘડા જે હાથમાં આવ્યું તેમાં તેલ ભરવા માટે રીતસર પડાપડી કરતા જોવા મળ્યા હતા.

અમરેલીના બગસર-ધારી હાઇવે ઉપર આવેલા હામાપુર ગામ નજીક જૂનાગઢ તરફથી પીપાવાવ પોર્ટ તરફ જઈ રહેલું એક તેલ ભરેલું ટેન્કર પલટી ગયું હતું. જેના કારણે અફડા તફડી મચી હતી. આ ઘટનાની જાણ આજુબાજુના સ્થાનિકોને થતા ડબ્બા સહિતની વસ્તુઓ લઈને સ્થાનિકો તેલ લેવા માટે ઉમટી પડ્યા હતા.#Amreli #Accident pic.twitter.com/357w6a7Uy6

— Gujarat Tak (@GujaratTak) October 25, 2022

થઈ ગયો ટ્રાફિક જામ
ટેન્કર પલ્ટી ખાઈ જતા અને રસ્તા પર તેલની રેલમછેલને કારણે લોકોની પડાપડી થવાને કારણે અહીં ટ્રાફિક જામ થઈ ગયો હતો. મહિલા પુરુષો સહિત બધા તેલ લેવા માટે દોડી ગયા હતા. ટેન્કર પલ્ટી ખાઈ જતાં સર્જાયેલી આ ઘટનાને પગલે લોકોમાં જાણે લોટરી લાગી ગઈ હોય તેવો માહોલ જોવા મળ્યો હતો કારણ કે અહીં તેલ લેવા માટે તેઓ પોતાના બાઈક, ટ્રેક્ટર જેવા વાહનો લઈને આવી પહોંચ્યા હતા. આ ઘટનાની કેટલીક તસવીરો વાયરલ થઈ રહી છે.

(વીથ ઈનપુટઃ હિરેન રવૈયા, અમરેલી)