ઓલિમ્પિકમાં હોકીમાં બ્રોન્ઝ મેડલ જીતતાની સાથે જ 'ધ ગ્રેટ વૉલ' પીઆર શ્રીજેશ થયા રિટાયર

પીઆર શ્રીજેશની સિદ્ધિઓ

શ્રીજેશ 2006 સાઉથ એશિયન ગેમ્સ દરમિયાન ભારતીય સિનિયર હોકી ટીમ માટે ડેબ્યૂ કર્યું હતું. 2011થી તે સતત ટીમ ઈન્ડિયા સાથે ગોલકીપર તરીકે જોડાયેલો છે. તેમની સિદ્ધિઓ વિશે વાત કરીએ તો, શ્રીજેશે 2014 અને 2022 એશિયન ગેમ્સમાં ભારત માટે ગોલ્ડ મેડલ જીતવામાં મહત્વપૂર્ણ યોગદાન આપ્યું હતું. તેની પાસે 2016 અને 2018ની હોકી ચેમ્પિયન્સ ટ્રોફીમાં પણ સિલ્વર મેડલ છે.

આ પણ વાંચોઃ ભારતીય હોકી ટીમે જીત્યો બ્રોન્ઝ મેડલ, 52 વર્ષ પછી ઓલિમ્પિકમાં મળ્યો બેક ટુ બેક ચંદ્રક

આ સિવાય તે ટીમ ઈન્ડિયા સાથે કોમનવેલ્થ ગેમ્સમાં બે વખત મેડલ વિજેતા પણ બની ચૂક્યો છે. પરંતુ તેની કારકિર્દીની સૌથી મોટી ઉપલબ્ધિ એ હશે કે તેણે 2020 ટોક્યો ઓલિમ્પિક અને 2024 પેરિસ ઓલિમ્પિકમાં પણ ભારત માટે મેડલ અપાવવામાં મોટો ફાળો આપ્યો છે. સતત બે ઓલિમ્પિક મેડલ જીત્યા બાદ નિવૃત્ત થવું શ્રીજેશની મહાનતાને વધુ મજબૂત બનાવે છે.

'ધ ગ્રેટ વોલ'

પીઆર શ્રીજેશ હોકી જગતના સર્વશ્રેષ્ઠ ગોલકીપરોમાંના એક છે. જો આપણે પેરિસ ઓલિમ્પિક 2024ની વાત કરીએ તો તેણે ઘણા મહત્વપૂર્ણ અવસરો પર વિરોધી ટીમને ગોલ કરવાથી રોકી છે. જ્યારે સ્પેન સામેની બ્રોન્ઝ મેડલ મેચમાં સ્પેનને છેલ્લી 2 મિનિટમાં બે પેનલ્ટી કોર્નર મળ્યા હતા, પરંતુ શ્રીજેશ ખડકની જેમ પોતાની જમીન પર ઊભો રહ્યો હતો. તેણે બેમાંથી એક પણ પ્રસંગમાં સ્પેનને ગોલ કરવા દીધો ન હતો. એક ઉત્તમ ગોલકીપર હોવાને કારણે તેને હોકીમાં 'ધ ગ્રેટ વોલ' તરીકે પણ ઓળખવામાં આવે છે.

બ્રોન્ઝ મેડલ શ્રીજેશને સમર્પિત

મેચ બાદ શ્રીજેશ ગોલ પોસ્ટ પર બેસી ગયો અને પોતાની ઐતિહાસિક અને શાનદાર કારકિર્દીની ઉજવણી કરી. કેપ્ટન હરમનપ્રીત સિંહે તેને મેદાનમાં પોતાના ખભા પર લઈ જઈને તેના પ્રત્યે સન્માન દર્શાવ્યું. દરમિયાન, મેચ પુરી થયા બાદ ઈન્ટરવ્યુમાં મનપ્રીત સિંહે કહ્યું કે ભારતની બ્રોન્ઝ મેડલ જીત પીઆર શ્રીજેશને સમર્પિત છે, જેમણે લાંબા સમય સુધી ભારતીય હોકી ટીમની સેવા કરી છે.