SCO સમિટનું થશે ઓનલાઇન આયોજન! અચાનક નિર્ણય બદલાયો

તેમણે કહ્યું કે વર્ચ્યુઅલ રીતે મીટિંગ યોજવાનો વિકલ્પ પહેલેથી જ ટેબલ પર હતો અને સોમવારે અંતિમ નિર્ણય લેવામાં આવ્યો હતો. સૂત્રોએ જણાવ્યું કે ઓનલાઈન મીટિંગ યોજવા પાછળ SCO સભ્ય દેશોના નેતાઓનું શેડ્યૂલ કારણ નહોતું. તેમણે કહ્યું કે, આ વર્ષે સપ્ટેમ્બરમાં નવી દિલ્હીમાં યોજાનારી G20 સમિટ માટે ચીન અને રશિયાના નેતાઓ ભારત આવી શકે છે. ફેબ્રુઆરી 2022માં યુક્રેન પર આક્રમણ શરૂ થયા બાદ રશિયાના રાષ્ટ્રપતિ વ્લાદિમીર પુતિનની આ પ્રથમ ભારત મુલાકાત હશે. આ ઉપરાંત સમિટ દરમિયાન ભારતીય વડાપ્રધાન અને ચીન અને પાકિસ્તાનના નેતાઓ વચ્ચે પણ સંભવ મુલાકાત થઈ શકે છે. આ બંને દેશો સાથે ભારતના સંબંધો હાલમાં વણસેલા છે.

તમને જણાવી દઈએ કે આ મહિનાની શરૂઆતમાં ભારતે શાંઘાઈ કોઓપરેશન ઓર્ગેનાઈઝેશનના સભ્ય દેશોના વિદેશ મંત્રીઓની બેઠકનું આયોજન કર્યું હતું. ગોવામાં યોજાયેલી આ બેઠકમાં પાકિસ્તાનના વિદેશ મંત્રી બિલાવલ ભુટ્ટો ઝરદારી સહિત તમામ સભ્ય દેશોના વિદેશ મંત્રીઓ વ્યક્તિગત રીતે સામેલ થયા હતા. બિલાવલે SCO મીટિંગમાં ભાગ લેવા માટે 4 મેના રોજ ગોવાની યાત્રા કરી હતી, જે 2011 પછી વરિષ્ઠ પાકિસ્તાની નેતાની ભારતની પ્રથમ મુલાકાત હતી.
આ પછી અટકળો લગાવવામાં આવી રહી હતી કે SCO સમિટ પણ વ્યક્તિગત રીતે યોજાશે જેમાં તમામ દેશોના રાષ્ટ્રાધ્યક્ષો ભાગ લેશે. જોકે, હવે તે ઓનલાઈન યોજાશે. ભારતે પહેલાથી જ તમામ SCO દેશોના નેતાઓને સમિટમાં ભાગ લેવા આમંત્રણ આપ્યું છે. SCOમાં ચીન, કઝાકિસ્તાન, કિર્ગિસ્તાન, પાકિસ્તાન, રશિયા, તાજિકિસ્તાન અને ઉઝબેકિસ્તાનનો સમાવેશ થાય છે. ઈરાન, બેલારુસ અને મંગોલિયાને નિરીક્ષક દેશો તરીકે આમંત્રણ આપવામાં આવ્યું છે. SCO પરંપરાને ધ્યાનમાં રાખીને, તુર્કમેનિસ્તાનને અધ્યક્ષના અતિથિ તરીકે આમંત્રણ આપવામાં આવ્યું છે.