ગુજરાતનું એવું મંદિર જ્યાં માનતા પૂરી થતા લોકો શ્રીફળ નહીં પરંતુ પાણીની બોટલ-પાઉચ ચઢાવે છે

કેમ લોકો પ્રસાદરૂપે પાણી ચડાવે છે
વાત એમ છે કે, 21 મે, 2013 ના રોજ સવારે 9 વાગ્યા આસપાસ અહીં એક રીક્ષા અને કાર વચ્ચે ગંભીર અકસ્માત થયો હતો. આ અકસ્માત એટલો ગંભીર હતો કે વાહનોમાં સવાર 8 લોકોમાંથી 6 ના ઘટનાસ્થળે જ મોત નીપજ્યા હતા. આ 6 લોકોમાં બાળકોનો પણ સમાવેશ થાય છે. જ્યારે આ અકસ્માત થયો ત્યારે આ બાળકો સતત પાણી પાણીની બૂમો પાડી રહ્યા હતા. આ રીતે બૂમો પાડતા પાડતા અને પાણી પીધા વિના આ બાળકોએ આ જગ્યાએ અંતિમ શ્વાસ લીધા હતા.

પાણી ચઢાવવાની માનતા રાખવાથી ધાર્યા કામ થાય છે
ત્યારથી સ્થાનિક લોકો બાળકોને દેવ ગણી પૂજા અર્ચના કરે છે અને જ્યાં તેમનો જીવ ગયો તે જગ્યાએ એક નાનકડી દેરી બનાવી. હવે અહીં લોકો પાણી ચઢાવવાની માનતા રાખે છે. ત્યારથી જ આ પ્રથા શરુ થઈ અને અહીં લોકો પાણી ચઢાવવાની માનતા રાખવા લાગ્યા.સ્થાનિકોની માનવું છે કે, અહીં પાણી ચઢાવવાની માનતા રાખવાથી તેમના ધાર્યા કામ પુરા થાય છે.

માનતા રાખ્યા બાદ આસપાસના ગામોમાં બોરના પાણી મીઠા થઈ ગયા
ઘણા લોકોએ તો રોગથી મુક્તિ માટે અહીં માનતા રાખી હતી, જે પુરી થતા તેઓ પણ દૂર દૂરથી અહીં પાણી ચઢાવવા આવે છે. એટલું જ નહીં આ જગ્યાની આસપાસના ગામોમાં બોરના પાણી પહેલા ખારા નીકળતા હતા પરંતુ આ મંદિરની બાધા રાખ્યા બાદ બોરના પાણી મીઠા નીકળે છે. જે બોરમાંથી મીઠું પાણી નીકળે તે પણ અહીં સૌથી પહેલા પાણી ચઢાવે છે.