Controversial Statement: ગોંડલમાં રાજકીય આગેવાનોએ સમાધાન કર્યું, અમારો વિરોધ ચાલું છેઃ વીરભદ્રસિંહ જાડેજા

Parasottam Rupala Statement Controversy: રાજકોટ બેઠકના લોકસભાના ભાજપના ઉમેદવાર પરસોત્તમ રૂપાલાએ ક્ષત્રિય સમાજને લઈને કરેલા વિવાદિત નિવેદનથી સમગ્ર સમાજમાં રોષ છે. વિવાદ અને વિરોધનો વંટોળ થંભવાનું નામ નથી લેતો. ડેમેજને કંટ્રોલ કરવા માટે અને આ વિવાદને ઠારવા માટે ભાજપે ગોંડલના પૂર્વ ધારાસભ્ય જયરાજસિંહ જાડેજાને મેદાનમાં ઉતાર્યા છે. ગઈકાલે જયરાજસિંહના અધ્યક્ષ સ્થાને ક્ષત્રિય સમાજનું સંમેલન યોજાયું હતું. જેમાં ક્ષત્રિય સમાજના આગેવાનો, ભાજપના ધારાસભ્યો અને લોકસભાના ઉમેદવાર પરષોતમ રૂપાલા સહિત વિવિધ સંગઠનોનો લોકો હાજર રહ્યા હતા. આ દરમિયાન જયરાજ સિંહે આ મામલાને થાળે પાડવાની કોશિશ કરી હતી. સંમેલન પૂર્ણ થયા બાદ જયરાજસિંહે કહ્યું હતું કે, આ વિવાદ આજ અહીં પૂર્ણ થયો છે. ત્યારે હજુ પણ કેટલાક ક્ષત્રિય સમાજના લોકોમાં આક્રોશ જોવા મળી રહ્યો છે અને તેઓ આ સમાધાનને રાજકીય સમાધાન ગણાવી રહ્યા છે.