કેજરીવાલની ધરપકડનો રાજકોટ-સુરતમાં ભારે વિરોધ, AAP-કોંગ્રેસના કાર્યકરોનું પોલીસ સાથે ઉગ્ર ઘર્ષણ

રાજકોટમાં MLA હેમંત ખવા-રેશ્મા પટેલની અટકાયત

અરવિંદ કેજરીવાલની ધરપકડનો રાજકોટમાં જોરદાર વિરોધ કરાયો હતો. શહેરના કિસાનપરા ચોક ખાતે મોટી સંખ્યામાં AAPના કાર્યકર્તાઓ વિરોધ કરવા પહોંચ્યા હતા. MLA હેમંત ખવા, રેશમા પટેલ કોંગ્રેસ નેતા હેમાંગ વસાવડા સહિત મોટી સંખ્યામાં આમ આદમી પાર્ટીના કાર્યકર્તાઓ અને આગેવાનો જોડાયા હતા. જોકે વિરોધ પ્રદર્શન દરમિયાન AAPના કાર્યકર્તાઓ અને પોલીસ વચ્ચે જોરદાર ઘર્ષણ થયું હતું. ધારાસભ્ય હેમંત ખવા, રેશમા પટેલ સહિત મોટી સંખ્યામાં કાર્યકર્તાઓની પોલીસ દ્વારા અટકાયત કરી લેવામાં આવી છે.

સુરતમાં કોંગ્રેસના લોકસભાના ઉમેદવાર ડિટેઈન

તો બીજી તરફ સુરતમાં પણ અરવિંદ કેજરીવાલની ધરપકડના વિરોધમાં કોંગ્રેસ અને AAPના કાર્યકરોએ વિરોધ કરવા ઉતર્યા હતા. શહેરના માનગઠ ચોક ખાતે કોંગ્રેસના સુરત લોકસભાના ઉમેદવાર નિલેશ કુંભાણી તેમના સમર્થકો અને AAP કાર્યકરો પહોંચ્યા હતા અને સૂત્રોચ્ચાર કર્યા હતા. જોકે પોલીસ દ્વારા ટીંગાટોળી કરીને તમામને કસ્ટડીમાં લઈ લેવામાં આવ્યા હતા.

(ઈનપુટ: સંજયસિંહ રાઠોડ-સુરત, રોનક મજિઠિયા-રાજકોટ)