સુરતમાં ભાઈની GFએ યુવતીને મળેલી સરકારી નોકરીની ઉમેદવારી રદ કરવા અરજી કરી નાખી, વિચિત્ર છે કારણ

લોકરક્ષકની ભરતીમાં પાસ થઈ હતી યુવતી
ઘટનાની વિગતો મુજબ, સુરતના પુણાગામ ખાતે રાધાસ્વામી સોસાયટીમાં રહેતી કાજલ (નામ બદલ્યું છે) નામની યુવતીએ વર્ષ 2021-22માં લોકરક્ષક દળની ભરતી જાહેરાતમાં ફોર્મ ભર્યું હતું. આ માટે તેણે પોતાના ભાઈનો ફોન નંબર ફોર્મમાં આપ્યો હતો. 4 જાન્યુઆરી 2022ના રોજ તેની પ્રેક્ટિકલ પરીક્ષા યોજાઈ જેમાં તેને 21 માર્ક્સ સાથે પાસ થઈ હતી. બાદમાં 9 સપ્ટેમ્બરે લેવાયેલી લેખિત પરીક્ષામાં પણ તે 52 માર્ક્સ લાવી આમ 73 માર્ક્સ સાથે લોકરક્ષકની ભરતીમાં તે પાસ થઈ ગઈ હતી.

યુવતીની જાણ બહાર ભાઈની GFએ કાંડ કર્યો
જોકે બાદમાં કોઈ અજાણી વ્યક્તિએ LRDની ભરતી વેબસાઈટ પર ફોર્મ પાછું ખેંચવાની અરજી કરી દીધી. આ માટે તેના ભાઈના ફોનથી OTP પણ તેમાં આપ્યો. જોકે બાદમાં ફોનમાં અરજી કેન્સલ થયાનો મેસેજ આવ્યો જે જોઈને ભાઈએ તેની બહેનને જાણ કરી હતી. જોકે કાજલે આવી કોઈ અરજી ન કરી હોવાથી તેણે સાઈબર ક્રાઈમમાં ફરિયાદ નોંધાવી હતી.

કેમ કરી ઉમેદવારી રદ કરવાની અરજી?
જે બાદ પોલીસ તપાસમાં સામે જાગૃતિ નામની યુવતીએ જ આ કારનામું કર્યું હોવાનું સામે આવ્યું હતું. જે કાજલના ભાઈની જ ગર્લફ્રેન્ડ હતી. હકીકતમાં જાગૃતિ અને કાજલ બંને બહેનપણીઓ પણ હતી. બંનેએ સાથે આ ભરતીમાં ફોર્મ ભર્યું હતું. જેમાં કાજલ પાસ થઈ ગઈ અને જાગૃતિ નાપાસ. આથી ઈર્ષ્યામાં તેણે બહેનપણીની નોકરી જતી રહે તે માટે આમ કર્યું. યુવતીના ભાઈનો ફોન ચોરીથી લઈને તેમાંથી OTP મેળવી અરજી કેન્સલ કરાવી દીધી હતી.

કાજલને મળશે નોકરી
જોકે બહેનપણીના કારણે યુવતીને મળેલી સરકારી નોકરી નહીં જાય. યુવતીની ફરિયાદ મળતા જ સાઈબર ક્રાઈમે ઉપરના લેવલે જાણ કરી દીધી હતી. જેથી તેને હાલ તો લોકરક્ષકની નોકરીમાં કોઈ વાંધો આવશે નહીં.