WIvsIND T20: ભારતની 7 વિકેટે જીત, સૂર્યાની વિસ્ફોટક બેટિંગ, તિલક વર્માએ ત્રીજી મેચમાં જ બનાવ્યો ખાસ રેકોર્ડ

વેસ્ટ ઈન્ડિઝ સામેની 5 મેચની T20 શ્રેણીમાં ભારતીય ટીમે શાનદાર વાપસી કરી છે. શ્રેણીની પ્રથમ બે મેચ હાર્યા બાદ ત્રીજી મેચમાં જીત મેળવી હતી. આ મેચમાં ભારતીય ટીમનો 7 વિકેટે વિજય થયો હતો. પરંતુ હજુ પણ વેસ્ટ ઈન્ડિઝ શ્રેણીમાં 2-1થી આગળ છે.

આ મેચમાં સૂર્યકુમાર યાદવ અને તિલક વર્માના બેટથી એવું તોફાન આવ્યું હતું, જેમાં વેસ્ટ ઈન્ડિઝની ટીમ તણખલાની જેમ વેરવિખેર થઈ ગઈ હતી. સૂર્યા અને તિલકની સામે કેરેબિયન બોલરોને સમજ ન પડી કે કઈ પ્રકારની બોલિંગ કરવી. વિન્ડીઝની આખી ટીમ વેરવિખેર દેખાતી હતી. જણાવી દઈએ કે વેસ્ટ ઈન્ડિઝે મેચમાં 160 રનનો ટાર્ગેટ આપ્યો હતો. જવાબમાં સૂર્યાએ 44 બોલમાં 83 અને તિલક વર્માએ 37 બોલમાં 49 રનની અણનમ ઈનિંગ રમીને ટીમને 17.5 ઓવરમાં જીત અપાવી હતી.

તિલકે ડેબ્યૂ કર્યા બાદ આ મોટા રેકોર્ડ બનાવ્યા

આ ઈનિંગ્સની મદદથી તિલક વર્માએ ધાંસૂ રેકોર્ડ પોતાના નામે કરી લીધો છે. તિલકે આ શ્રેણીથી આંતરરાષ્ટ્રીય ક્રિકેટમાં ડેબ્યૂ કર્યું હતું. તેના ડેબ્યુ પછી, તે પ્રથમ ત્રણ મેચમાં સતત 30 કે તેથી વધુ સ્કોર કરનારો બીજો ભારતીય ખેલાડી બન્યો છે.

Suryakumar Yadav, Tilak Varma shine as India pull one back to keep the series alive 💪#WIvIND | 📝 https://t.co/v1bKUN3ftO pic.twitter.com/By6tBpGVJ2

— ICC (@ICC) August 8, 2023

આ પહેલા આ રેકોર્ડ માત્ર સૂર્યકુમારના નામે હતો. આ સિવાય તિલક વર્મા ડેબ્યૂ બાદ પહેલી 3 T20 ઇનિંગ્સમાં સૌથી વધુ રન બનાવનાર સંયુક્ત રીતે બીજા ભારતીય બની ગયા છે. આ મામલામાં દીપક હુડ્ડા ટોપ પર છે જેણે 172 રન બનાવ્યા હતા. જે બાદ તિલક અને સૂર્યાએ સમાન 139 રન બનાવ્યા હતા.

ડેબ્યૂ બાદ પ્રથમ 3 ટી20 મેચમાં ભારતીય ટોપ સ્કોરર

172 રન – દીપક હુડ્ડા
139 રન – સૂર્યકુમાર યાદવ અને તિલક વર્મા
109 રન – ગૌતમ ગંભીર

સૂર્યકુમારે સિક્સરની સદી ફટકારી હતી

સૂર્યકુમાર T20 ઈન્ટરનેશનલ ક્રિકેટમાં 100 સિક્સર મારનાર ત્રીજો ભારતીય બની ગયો છે. સાથે એકંદરે 14મો ખેલાડી બન્યો. T20 ઈન્ટરનેશનલ ક્રિકેટમાં સૌથી વધુ સિક્સર ફટકારવામાં રોહિત શર્મા ટોપ પર છે. તેણે 182 સિક્સર ફટકારી છે. તેના પછી ન્યૂઝીલેન્ડના માર્ટિન ગુપ્ટિલે 173 સિક્સ ફટકારી છે.

T20માં સૌથી વધુ છગ્ગા મારનાર ભારતીય

રોહિત શર્મા – 182
વિરાટ કોહલી – 117
સૂર્યકુમાર – 101

આ રીતે ભારતીય ટીમે ત્રીજી મેચ જીતી હતી
મેચમાં 160 રનના લક્ષ્યાંકના જવાબમાં ભારતીય ટીમે 3 વિકેટ ગુમાવીને 17.5 ઓવરમાં 164 રન બનાવીને મેચ જીતી લીધી હતી. ટીમ માટે સૂર્યકુમાર યાદવે 44 બોલમાં 83 રનની ધમાકેદાર ઇનિંગ રમી હતી. આ દરમિયાન તેણે 4 સિક્સ અને 10 ફોર ફટકારી હતી. જ્યારે તિલક વર્માએ 37 બોલમાં 49 રનની અણનમ ઇનિંગ રમી હતી. વિન્ડીઝ તરફથી અલ્ઝારી જોસેફે 2 અને ઓબેડ મેકકોયે 1 વિકેટ ઝડપી હતી.

મેચમાં વેસ્ટ ઈન્ડિઝના કેપ્ટન રોવમેન પોવેલે ટોસ જીતીને પ્રથમ બેટિંગ કરવાનો નિર્ણય કર્યો હતો. આ પછી ટીમે 5 વિકેટ ગુમાવીને 159 રન બનાવ્યા હતા. વિન્ડીઝ તરફથી ઓપનર બ્રેન્ડન કિંગે 42 બોલમાં 42 રનની ઇનિંગ રમી હતી. આ પછી કેપ્ટન રોવમેન પોવેલે 19 બોલમાં અણનમ 40 રન બનાવ્યા હતા. ટીમ ઈન્ડિયા તરફથી કુલદીપ યાદવે 28 રનમાં 3 વિકેટ લીધી હતી. જ્યારે અક્ષર પટેલ અને મુકેશ કુમારને 1-1 સફળતા મળી હતી.