Paris Olympic 2024: ઓલિમ્પિકમાં ભારતીય બોક્સર સાથે ચીટિંગ થઈ? જજ પર ભડક્યા ફેન્સ

નિશાંતની હાર બાદ ફેન્સ ગુસ્સે થયા!

નિશાંતે પ્રારંભિક રાઉન્ડ સરળતાથી જીતી લીધો હતો. પ્રથમ રાઉન્ડમાં, પાંચમાંથી ચાર જજે નિશાંતને વધુ સારો ગણ્યો અને 10-10 માર્ક્સ આપ્યા. પછી નિશાંત બીજા રાઉન્ડમાં સંપૂર્ણ નિયંત્રણમાં જોવા મળ્યો, જ્યાં તેણે મેક્સિકન ખેલાડી પર ઘણા મોટા જેબ હૂક માર્યા, છતાં તે રાઉન્ડમાં જજોએ આશ્ચર્યજનક રીતે વેરડેની તરફેણ કરી. બીજા રાઉન્ડમાં માત્ર બે જજે નિશાંતની તરફેણમાં 10-10 માર્ક્સ આપ્યા હતા. જ્યારે ત્રણ જજોએ વેરડેની તરફેણમાં ચુકાદો આપ્યો હતો.

જોકે, નિશાંત દેવ ત્રીજા રાઉન્ડમાં ગતિ જાળવી શક્યો નહોતો. ત્રીજા રાઉન્ડમાં પાંચેય જજોએ વેરડેની તરફેણમાં ચુકાદો આપ્યો હતો. જ્યારે ત્રીજો રાઉન્ડ પૂરો થયો ત્યારે નિશાંત દેવ એકદમ આત્મવિશ્વાસથી ભરેલો દેખાતો હતો. તેને પૂરી ખાતરી હતી કે તે મેચ જીતી ગયો છે, પરંતુ જે નિર્ણય આવ્યો તે આશ્ચર્યજનક હતો. નિશાંત ક્વાર્ટર ફાઇનલમાં 1-4થી હારી ગયો હતો. કોમેન્ટેટર પણ આ નિર્ણયથી આશ્ચર્યચકિત થયા હતા.

ભારત માટે ઓલિમ્પિકમાં બ્રોન્ઝ જીતનાર સ્ટાર બોક્સર વિજેન્દર સિંહ પણ આ મેચમાં સ્કોરિંગ સિસ્ટમથી ચકીત થઈ ગયો હતો. વિજેન્દરે X પર લખ્યું, 'મને ખબર નથી કે સ્કોરિંગ સિસ્ટમ શું છે, પરંતુ મને લાગે છે કે તે ખૂબ જ નજીકની મેચ હતી. તે ખૂબ જ સારી રીતે રમ્યો...કોઈ નહીં ભાઈ. સોશિયલ મીડિયા પર ફેન્સની પ્રતિક્રિયાઓ પણ સામે આવી છે. ફેન્સ માની રહ્યા છે કે નિશાંતને જાણીજોઈને હરાવવામાં આવ્યો છે જ્યારે તે જીતવાનો હકદાર હતો.

કોણ છે નિશાંત દેવ?

નિશાંત દેવનો જન્મ 23 ડિસેમ્બર 2000ના રોજ હરિયાણાના કરનાલમાં થયો હતો. નિશાંતે 2012 માં બોક્સિંગ શરૂ કર્યું. ત્યારબાદ નિશાંતે કરનાલના કર્ણ સ્ટેડિયમમાં કોચ સુરેન્દ્ર ચૌહાણની નીચે ટ્રેનિંગ શરૂ કરી. બાદમાં નિશાંત કર્ણાટકના વિજયનગરમાં શિફ્ટ થયો, જ્યાં તેણે ઈન્સ્પાયર ઈન્સ્ટિટ્યૂટ ઓફ સ્પોર્ટ્સ (ISS)માં તાલીમ લીધી.

19 વર્ષની ઉંમરે, નિશાંતે સિનિયર નેશનલ ચેમ્પિયનશિપમાં કર્ણાટકનું પ્રતિનિધિત્વ કર્યું હતું, પરંતુ ક્વાર્ટર ફાઇનલમાં હાર્યો હતો. જો કે, ભારતીય બોક્સિંગના તત્કાલીન ઉચ્ચ પ્રદર્શન નિર્દેશક સેન્ટિયાગો નીવા તેની રમતથી ખૂબ પ્રભાવિત થયા હતા. સેન્ટિયાગો તેને ભારતીય શિબિરમાં લઈ ગયા, જ્યાં તેણે અનુભવી બોક્સર પાસે તાલીમ લેવાનું શરૂ કર્યું. નિશાંતે રાષ્ટ્રીય સ્તરે પોતાની છાપ છોડી. 2021 અને 2022માં તેણે નેશનલ ચેમ્પિયનશિપમાં ગોલ્ડ મેડલ જીત્યો હતો. રસપ્રદ વાત એ છે કે તેણે ક્યારેય આંતરરાષ્ટ્રીય સ્તરે જુનિયર વર્ગમાં ભાગ લીધો નથી.

નિશાંત દેવની બોક્સિંગ સફર આસાન રહી નથી. વર્ષ 2010માં નિશાંત સાથે એક દુ:ખદ અકસ્માત થયો હતો, જ્યારે સીડી પરથી પડી જવાને કારણે તેનો જમણો ખભા તૂટી ગયો હતો. જેના કારણે તેના ખભામાં સળિયો નાખવામાં આવ્યો હતો. ત્યારે નિશાંત 10 વર્ષનો હતો. 

નિશાંત દેવ હિસારમાં યોજાયેલી નેશનલ બોક્સિંગ ચેમ્પિયનશિપ દ્વારા જાન્યુઆરી 2023માં રિંગમાં પરત ફર્યો હતો. નિશાંતે મે 2023માં તાશ્કંદમાં યોજાયેલી IBA મેન્સ વર્લ્ડ બોક્સિંગ ચેમ્પિયનશિપમાં બ્રોન્ઝ મેડલ જીત્યો હતો, જે આંતરરાષ્ટ્રીય સ્તરે તેનો પહેલો મેડલ હતો. નિશાંતે આ વર્ષે બેંગકોકમાં આયોજિત બીજી વર્લ્ડ બોક્સિંગ ક્વોલિફાઈંગ ટુર્નામેન્ટ દ્વારા પેરિસ ઓલિમ્પિક્સ 2024 માટે ક્વોલિફાય કર્યું હતું. નિર્ણાયક મેચમાં નિશાંતે મેડાગાસ્કરના બોક્સર વાસિલે સેબોટારીને 5-0થી હરાવ્યો હતો.