Women's T20 World Cup: મહિલા T20 વર્લ્ડ કપ હવે બાંગ્લાદેશમાં નહીં યોજાઈ? તખ્તાપલટ બાદ ICCની ચાંપતી નજર

ICC Women's T20 World Cup 2024: ઇન્ટરનેશનલ ક્રિકેટ કાઉન્સિલ (ICC)ની આંતરિક સુરક્ષા ટીમ બાંગ્લાદેશમાં ચાલી રહેલી અરાજકતા પર નજર રાખી રહી છે, કારણ કે ઓક્ટોબરમાં આ દેશમાં મહિલા T20 વર્લ્ડ કપનું આયોજન થવાનું છે. પહેલાથી નક્કી કરાયેલા શેડ્યૂલ મુજબ બાંગ્લાદેશ 3 થી 20 ઓક્ટોબર દરમિયાન મહિલા T20 વર્લ્ડ કપની યજમાની કરવાની છે.

બાંગ્લાદેશમાં હાલત ગંભીર

બાંગ્લાદેશમાં ફેલાયેલી હિંસાને કારણે વડાપ્રધાન શેખ હસીનાએ રાજીનામું આપીને દેશ છોડીને ભાગી જવું પડ્યું હતું. આર્મી ચીફ જનરલ વકાર-ઉઝ-ઝામાએ સોમવારે જણાવ્યું હતું કે, ઢાકામાં હસીનાની સરકાર સામે ભારે વિરોધ વચ્ચે વચગાળાની સરકાર બાંગ્લાદેશમાં સત્તા સંભાળશે. છેલ્લા બે દિવસમાં દેશમાં ફેલાયેલી હિંસામાં 100થી વધુ લોકોએ જીવ ગુમાવ્યા છે.

ટૂર્નામેન્ટ બાંગ્લાદેશમાં નહીં યોજાઈ?

ICC હાલમાં આ મુદ્દે હજુ સુધી કોઈ નિર્ણય લીધો નથી. ICC બોર્ડના એક સભ્યએ કહ્યું, 'ICC પાસે તેના તમામ સભ્ય દેશોમાં સ્વતંત્ર સુરક્ષા મોનિટરિંગ સિસ્ટમ છે. પરિસ્થિતિ પર નજીકથી નજર રાખવામાં આવી રહી છે, પરંતુ ટૂર્નામેન્ટ શરૂ થવામાં સાત અઠવાડિયા બાકી છે. આવી સ્થિતિમાં, ટૂર્નામેન્ટ બાંગ્લાદેશથી કોઈ બીજા લોકેશન પર ખસેડવામાં આવશે કે નહીં તે અંગે હજુ કોઈ નિર્ણય લેવામાં આવ્યો નથી. ICC સૂત્રએ જણાવ્યું હતું કે માર્ચ 2022 માં શ્રીલંકામાં અશાંતિની સમાન સ્થિતિ હતી જ્યારે વિરોધીઓએ ભ્રષ્ટાચાર અને મોંઘવારીનો ઉલ્લેખ કરીને પૂર્વ રાષ્ટ્રપતિ ગોટાબાયા રાજપક્ષેના સત્તાવાર નિવાસસ્થાન પર હુમલો કર્યો હતો. આ ઘટના બાદ ઓસ્ટ્રેલિયન ક્રિકેટ ટીમ જૂનમાં દ્વિપક્ષીય શ્રેણી માટે ત્યાં ગઈ હતી. બાંગ્લાદેશમાં ઢાકા અને સિલ્હેટમાં વર્લ્ડ કપ યોજાવા જઈ રહ્યો છે. ભારતના વિદેશ મંત્રાલયે (MEA) ભારતીય નાગરિકોને વધુ સૂચના ન મળે ત્યાં સુધી બાંગ્લાદેશની મુસાફરી ન કરવાની કડક સલાહ આપી છે. BCCI હંમેશા આવી પરિસ્થિતિઓમાં સરકારની સલાહને અનુસરે છે.

T-20 વર્લ્ડ કપ શ્રીલંકામાં યોજાશે?

ICC અનિવાર્ય પરિસ્થિતિઓ માટે આકસ્મિક યોજના ધરાવે છે અને આ કિસ્સામાં શ્રીલંકા એક વિકલ્પ બની શકે છે. શ્રીલંકાએ ત્યાં સપ્ટેમ્બર અને ઓક્ટોબર વચ્ચે 2012 મેન્સ ટી20 વર્લ્ડ કપનું આયોજન કર્યું હતું. તે જોવાનું રસપ્રદ રહેશે કે સેના દેશો (દક્ષિણ આફ્રિકા, ઈંગ્લેન્ડ, ન્યુઝીલેન્ડ અને ઓસ્ટ્રેલિયા) તેમની મહિલા ટીમોને એવા દેશમાં મોકલે છે કે જ્યાં સુરક્ષાની સ્થિતિ નબળી હોય. આઈસીસીએ બાંગ્લાદેશને જવાબ આપ્યો છે અને ઓક્ટોબરમાં મહિલા ટી20 વર્લ્ડ કપની યજમાની કરવાનો તેમનો અધિકાર છે. ICC પ્રવક્તાએ કહ્યું- ICC તેમની સુરક્ષા એજન્સીઓ અને અમારા પોતાના સ્વતંત્ર સુરક્ષા સલાહકારો સાથે સંકલનમાં બાંગ્લાદેશ ક્રિકેટ બોર્ડ (BCB)ના વિકાસ પર ખાસ નજર રાખી બેઠું છે.

શા માટે છે વિવાદ?

બાંગ્લાદેશમાં વિવાદાસ્પદ અનામત પ્રણાલીને નાબૂદ કરવાની માંગ સાથે વિરોધ પ્રદર્શન થઈ રહ્યા છે. આ અંતર્ગત 1971માં બાંગ્લાદેશ મુક્તિ યુદ્ધમાં ભાગ લેનારા લડવૈયાઓના સંબંધીઓને સરકારી નોકરીઓમાં 30 ટકા અનામત આપવાની જોગવાઈ કરવામાં આવી હતી.