ચૂંટણીની તૈયારી હવે ચૂંટણી પંચે પણ શરૂ કરી, રાજ્યમાં રાજકીય માહોલ જામ્યો

આવનાર સમયમાં મતતદાર યાદી સુધારણાની કામગીરી શરૂ કરવા જઇ રહી છે ત્યારે બીજી તરફ ચૂંટણી પ્રક્રિયાને વધુ ચોકસાઈપૂર્ણ બનાવવામાં અને પારદર્શી, નિષ્પક્ષ, મુક્ત અને ન્યાયી ચૂંટણીઓ સુનિશ્ચિત કરવામાં મતદાન માટેના ઈલેક્ટ્રોનિક વોટીંગ મશીન એટલે કે EVM અને VVPATના ફર્સ્ટ લેવલ ચેકીંગ મહત્વની ભૂમિકા ભજવે છે. જે ધ્યાને લેતાં ભારતના ચૂંટણી પંચની સ્થાયી સૂચનાઓ મુજબ આગામી ગુજરાત વિધાનસભાની સામાન્ય ચૂંટણીઓની પૂર્વ તૈયારીઓના ભાગરૂપે તા.૧લી ઓગષ્ટથી રાજ્યના ૧૮ જિલ્લાઓમાં EVM અને VVPATના ફર્સ્ટ લેવલ ચેકીંગની કામગીરી શરૂ કરી દેવામાં આવી છે.

ફર્સ્ટ લેવલ ચેકીંગના નિરિક્ષણ અર્થે ભારતના ચૂંટણી પંચ દ્વારા ઓબ્ઝર્વર્સની પણ નિમણૂંક કરવામાં આવી છે. ઉલ્લેખનીય છે કે, ગત તા.૧૫મી જુલાઈથી રાજ્યના ૦૯ જિલ્લાઓમાં EVM અને VVPATના ફર્સ્ટ લેવલ ચેકીંગની કામગીરી શરૂ કરી દેવામાં આવી હતી.

યુવા મતદાર સપ્તાહની ઉજવણી થશે
યુવા મતદારોની ચૂંટણી પ્રક્રિયામાં ગુણવત્તાયુકત ભાગીદારી વધે તે આશયથી મતદાર જાગૃતિ અને કેળવણી અભિયાન(SVEEP) અંતર્ગત પ્રતિવર્ષ યુવા મતદાર મહોત્સવની ઉજવણી કરવામાં આવે છે. ચાલુ વર્ષે ગુજરાત વિધાનસભાની સામાન્ય ચૂંટણી યોજાનાર છે તે પૂર્વે તા. ૧૨મી ઓગસ્ટથી તા.૨૨મી ઓગસ્ટ દરમ્યાન રાજ્યભરમાં ‘યુવા મતદાર મહોત્સવ-૨૦૨૨’ની ઉજવણી કરવામાં આવશે. આમ ચૂંટણી નજીક આવતાની સાથે જ હવે રાજ્યમાં રાજકીય માહોલ તૈયાર થવા લાગ્યો છે.