અત્યાર સુધી ભાજપ-કોંગ્રેસનું ઈલુ-ઈલુ ચાલ્યું, આ વખતે કોંગ્રેસના તમામ વોટ AAPને મળવા જોઈએ: કેજરીવાલ

ભાજપ-કોંગ્રેસ વચ્ચે ઈલુ-ઈલુની રાજનીતિ
અરવિંદ કેજરીવાલે કહ્યું કે, અત્યાર સુધી ભાજપ-કોંગ્રેસ વચ્ચે ઈલુ-ઈલુની રાજનીતિ ચાલતી રહી. હવે ઈમાનદારીની રાજનીતિ ચાલશે. આ વખતે કોંગ્રેસને એક પણ મત ન પડવો જોઈએ. આ તમામ મત આમ આદમી પાર્ટીને આપજો. હું પણ આમ આદમી છું મને રાજનીતિ નથી આવડતી, હું એક સામાન્ય માણસ છું એટલે એક સામાન્ય માણસની સમસ્યા સમજૂ છું. હું તમને 5 વર્ષની ગેરંટી આપું છું. કામ ન કરીએ તો ધક્કા મારીને કાઢી મૂકજો. ફરી આવવા ન દેતા. આ કેજરીવાલની ગેરંટી છે, તૂટશે નહીં.

લઠ્ઠાકાંડ પર સરકાર પર કેજરીવાલના પ્રહાર
કેજરીવાલે આ સાથે જ બોટાદના લઠ્ઠાકાંડ વિશે ગુજરાત સરકાર પર આકરા પ્રહાર કર્યા. તેમણે કહ્યું કે, ઝેરી દારૂ પીવાથી આટલા બધા લોકોના મોત થયા તેનાથી મને દુઃખ થયું, પણ તેનાથી પણ વધારે દુઃખ મને એ વાતનું થયું કે ગુજરાતના મુખ્યમંત્રી એમને મળવા હોસ્પિટલ ન ગયા. મને દુઃખ થયું જેમનું મોત થયું તેમના પરિવારને મળવા પણ મુખ્યમંત્રી ન ગયા. દરેક વસ્તુમાં વોટ નથી હોતો.

અરવિંદ કેજરીવાલની આદિવાસીઓને આ 6 ગેરેંટી

• આદિવાસીઓ માટે જે સંવિધાનની 5મી વ્યવસ્થા છે તેને સંપૂર્ણ રીતે લાગુ કરીશું. તેમના માટેના PESA એક્ટને લાગુ કરીશું. આદિવાસી ગામોમાં ગ્રામસભાની મંજૂરી વિના કશું નહીં થાય. જે ટ્રાઈબલ એડવાઈઝરી કમિટી છે, જેનું કામ આદિવાસી સમાજના ક્ષેત્રમાં કેવો વિકાસ થાાય, ફંડનો કેવી રીતે ઉપયોગ કરવો વગેરે છે, તે ટ્રાઈબલ એવાઈઝરી કમિટીના ચેરમેન ટ્રાઈબલ હશે.
• દરેક આદિવાસી ગામમાં સારી સ્કૂલો ખોલીશું.
• દિલ્હીના મહોલ્લા ક્લિનિકની જેમ દરેક ગામમાં ક્લિનિક ખોલીશું. તેમાં સારવાર મફત હશે. આદિવાસી વિસ્તારમાં મલ્ટીસ્પેશ્યાલિટી હોસ્પિટલ ખોલીશું.
• જાતિનું પ્રમાણપત્ર મેળવવામાં જે સમસ્યા આવે છે, તેની પ્રક્રિયા સરળ બનાવીશું.
• ઘર ન હોય તેવા ગરીબ આદિવાસીઓને ઘર આપવામાં આવશે.
• દરેક ગામ સુધી રસ્તો બનાવાશે.