બિલ્કીસ બાનો કેસ: જીગ્નેશ મેવાણીએ સરકારને ઘેરી, કહ્યું, બળાત્કારીઓ પર પ્રેમ ઊભરાઈ આવ્યો!

જીગ્નેશ મેવાણીએ ટ્વીટ કરીને શું કહ્યું?
જીગ્નેશ મેવાણીએ ટ્વીટ કરીને કહ્યું કે, ગુજરાતમાં 2002માં 23 વર્ષની સગર્ભા બિલ્કીસ બાનો પર થયેલા ગેંગરેપ કેસમાં કોર્ટે 11 દોષિતોને આજીવન કેદની સજા ફટકારી હતી, પરંતુ આ બળાત્કારીઓ પર ભાજપને એટલો પ્રેમ ઊભરાઈ આવ્યો કે તાજેતરમાં જ ગુજરાત સરકારે તમામ આરોપીઓને મુક્ત કરવાનો નિર્ણય લીધો છે. વાહ રે ગુજરાત મોડલ !

गुजरात में 2002 में 23 वर्षीय गर्भवती बिलकिस बानो पर हुए गैंग रेप के मामले में अदालत ने 11 दोषियों को आजीवन कारावास की सजा सुनाती थी, लेकिन इन बलात्कारियों से भाजपा को ईतनी महोब्बत हो गई कि हाल ही में गुजरात सरकार ने सभी आरोपियों को रिहा करने का फैसला किया है!
वाह रे गुजरात मॉडल

— Jignesh Mevani (@jigneshmevani80) August 17, 2022

રાજ્ય સરકારે આ કમિટી પર નિર્ણય લેવાની સત્તા સોંપી હતી
ઉલ્લેખનીય છે કે, બિલકિસ બાનો કેસમાં જેલમાં સજા કાપી રહેલા 11 કેદીઓને છોડવા કે નહીં તે નિર્ણય લેવા માટે ગુજરાત સરકારે એક કમિટી બનાવી હતી. આ કમિટીમાં ગોધરાના કલેક્ટર સુજય મલ્હોત્રા અધ્યક્ષ હતા. જ્યારે ભાજપના પંચમહાલના બે ધારાસભ્યો હતા, ગોધરાના ધારાસભ્ય સી.કે રાઉલજી હતા, જ્યારે અન્યમાં કલોલના ધારાસભ્ય સુમન ચૌહાણ તથા પંચમહાલના સાંસદ રતનસિંહ રાઠોડ અને બાકી અન્ય મળીને કુલ 11 સદસ્યોની કમિટી બનાવવામાં આવી હતી. જેમણે 18 વર્ષથી જેલમાં બંધ આ કેદીઓને છોડવા અંગે નિર્ણય લીધો હતો.

18 વર્ષથી જેલમાં બંધ હતા કેદીઓ
ગુજરાતમાં 2002માં ગોધરા કાંડ બાદ ફાટી નીકળેલા કોમી રમખાણોમાં દાહોદ જિલ્લાના રણધીકપુર ખાતે ગેંગ રેપ અને હત્યા તેમજ કોમી તોફાનોની ઘટના બની હતી. આ સમગ્ર મામલે સીબીઆઈ દ્વારા તપાસ કરવામાં આવી હતી. જેમાં સીબીઆઈની સ્પેશ્યલ કોર્ટમાં સુનાવણી બાદ 11 લોકોને આજીવન કેદની સજા કરવામાં આવી હતી. જે બાદથી તમામ કેદીઓ જેલમાં બંધ હતો.

તાજેતરમાં આ 11 કેદીઓએ 18 વર્ષની સજા કાપ્યા બાદ મુક્ત થવા માટે સુપ્રીમ કોર્ટમાં અરજી કરી હતી. જે બાદ સુપ્રીમ કોર્ટે તેમને મુક્ત કરવાનો નિર્ણય ગુજરાત સરકાર પર છોડ્યો હતો. ત્યારે 15મી ઓગસ્ટના દિવસે રાજ્ય સરકારે તમામ 11 કેદીઓને મુક્ત કરવા માટે હુકમ કરતા તેમને ગોધરાની સબજેલમાંથી છોડવામાં આવ્યા હતા.

શું હતો સમગ્ર મામલો?
નોંધનીય છે કે, વર્ષ 2002માં ગોધરાકાંડ વખતે 17 જેટલા લોકોએ બિલકિસ બાનોના પરિવાર પર હુમલો કર્યો હતો. દાહોદ પાસે રણધીકપુર ગામમાં ટોળાએ બિલકિસ બાનોના પરિવાર પર હુમલો કરી 7 લોકોની હત્યા કરી હતી. બિલકિસ પર પણ સામુહિક દુષ્કર્મ આચરાયું હતું. આ દરમિયાન બિલકિસને પાંચ મહિનાનો ગર્ભ પણ હતો. આ મામલે વર્ષ 2008માં આરોપીઓને દોષી જાહેર કરીને આજીવન કેદની સજા ફટકારવામાં આવી હતી.