ઉત્તર ગુજરાતમાં જળબંબાકાર: નેશનલ-સ્ટેટ હાઇવે બંધ, જ્યાં જુઓ ત્યાં પાણી જ પાણી

સાબરકાંઠાના તલોદમાં 9 ઇંચ વરસાદથી સમગ્ર શહેરમાં જળબંબાકારની સ્થિતિ છે. છત્રીસા ગામ બેટમાં ફેરવાઇ ગયું છે. ગામ સંપર્ક વિહોણું બનતા ઉચ્ચ અધિકારીઓ પણ ઘટના સ્થળે પહોંચ્યા છે. ગામ લોકો સાથે સતત સંપર્ક બનાવી રહ્યા છે. કોઇ પણ સ્થિતિને પહોંચી વળવા માટેની આનુષાંગિત તૈયારીઓ શરૂ કરી દીધી છે. પાણી ભરાતા 100 લોકોનું સ્થળાંતર પણ કરવામાં આવ્યું છે. જેમાં 40 પશુઓને રેસક્યું કરીને સલામત સ્થળે ખસેડવામાં આવ્યા છે.

ઇડરમાં સ્થળ ત્યાં જળ જેવી સ્થિતિ
ભારે વરસાદના કારણે ઇડર શહેર અને હાઇવે પર જળબંબાકારની સ્થિતિ છે. ઇડર-હિંમતનગર સ્ટેટ હાઇવે રોડ પાણીમાં ડુબી ચુક્યો છે. જેના કારણે અહીં ભારે ટ્રાફીક જામ સર્જાયો છે. ઇડરમાં 2 કલાકમાં 4 ઇંચ વરસાદ ખાબકતા નિચાણવાળા વિસ્તારોમાં રહેલી મોટા ભાગની સોસાયટીઓમાં પાણી ભરાઇ ગયા છે. લોકોના ઘરોમાં ગોઠણ ગોઠણ સમા પાણી ભરાયા છે.

સાબરકાંઠામાં સતત વરસાદના કારણે અનેક મુશ્કેલીઓ સર્જાઇ છે. સાંબરકાંઠામાં વરસાદના કારણે તલોદ, પ્રાંતિજ, હિંમતનગર બાદ ઇડરમાં પણ ભારે વરસાદના કારણે તારાજી સર્જાઇ છે. ભારે વરસાદના કારણે હિંમતનગર-અંબાજી માર્ગ પર પાણી ફરી વળ્યા હતા. જેના કારણે હાઇવે પર લાંબો ટ્રાફીક જામ સર્જાયો હતો.