ઓડિશામાં થયેલ ટ્રેન અકસ્માતને લઈ રેલવે મંત્રીએ આપ્યું મહત્વનું નિવેદન, આ કારણે થયો અકસ્માત

તેમણે કહ્યું કે મમતા બેનર્જીએ જે કહ્યું તે નહોતું, પરંતુ અકસ્માતનું બીજું કોઈ કારણ હતું. મમતા બેનર્જીના આરોપો પર રેલવે મંત્રીએ કહ્યું, ‘કવચ સાથે તેને કોઈ લેવાદેવા નથી. તેનું કારણ એ નથી કે જે ગઈ કાલે મમતા બેનર્જીએ કહ્યું હતું. તેમણે વધુમાં કહ્યું કે, ‘રેલવે સુરક્ષા કમિશનરે મામલાની તપાસ કરી છે. ઈલેક્ટ્રોનિક ઈન્ટરલોકિંગમાં ફેરફારને કારણે આ અકસ્માત થયો હતો. તપાસ રિપોર્ટ આવવા દો. અમે ઘટનાના કારણો અને તેના માટે જવાબદાર લોકોની ઓળખ કરી લીધી છે. અત્યારે અમારું ધ્યાન ટ્રેકના રિસ્ટોરેશન પર છે.

બુધવારથી ફુલ ટ્રેક કાર્યરત થશે
રેલવે મંત્રીએ કહ્યું કે આ ટ્રેક બુધવાર સવાર સુધીમાં કાર્યરત થઈ જશે. તેમણે કહ્યું કે તમામ મૃતદેહોને બહાર કાઢવામાં આવ્યા છે અને અમારો ટાર્ગેટ છે કે બુધવારની સવાર સુધીમાં રિપેરિંગનું કામ પૂર્ણ કરી દેવામાં આવે જેથી કરીને આ ટ્રેક પર ટ્રેનો દોડવા લાગે. તેમણે કહ્યું, ‘વડાપ્રધાન દ્વારા ગઈકાલે આપવામાં આવેલા નિર્દેશો પર કામ ઝડપથી ચાલી રહ્યું છે. ગઈ રાત્રે ટ્રેકનું કામ લગભગ થઈ ગયું. આજે એક ટ્રેકને સંપૂર્ણ રિપેર કરવાનો પ્રયાસ કરવામાં આવશે. તમામ બોક્સ દૂર કરવામાં આવ્યા છે. મૃતદેહોને બહાર કાઢવામાં આવ્યા છે. કામ ઝડપથી ચાલી રહ્યું છે. બુધવાર સવાર સુધીમાં સામાન્ય રૂટ ચાલુ થાય તેવા પ્રયાસો હાથ ધરાયા છે.

કેન્દ્રીય મંત્રી ધર્મેન્દ્ર પ્રધાને કહ્યું, ‘શક્ય તેટલી વહેલી તકે સામાન્ય સ્થિતિ સ્થાપિત કરવાની જવાબદારી અમારી છે. આ અકસ્માતમાં મૃત્યુઆંક 270 ને વટાવી ગયો છે. કારણોની તપાસ કરવામાં આવી રહી છે. અમે આ માટે જવાબદાર વ્યક્તિઓ સામે કડક કાર્યવાહી કરીશું.

288 લોકોએ ગુમાવ્યો જીવ
ઓડિશાના બાલાસોરમાં શુક્રવારે સાંજે ત્રણ ટ્રેનો વચ્ચે થયેલી ભયાનક ટક્કરમાં અત્યાર સુધીમાં 288 લોકોના મોત થયા છે. જ્યારે એક હજારથી વધુ લોકો ઘાયલ થયા છે. બચાવ અને રાહત કાર્ય બાદ  શનિવારે રાત્રે જ પાટા પરથી મોટાભાગનો કાટમાળ હટાવી લીધો છે અને ટૂંક સમયમાં ટ્રેક ચાલુ કરવાના પ્રયાસો ચાલુ છે.