રાજસ્થાનના મુખ્યમંત્રી બનવાની અટકળોની વચ્ચે બાબા બાલકનાથે લોકસભામાંથી આપ્યું રાજીનામું

Rajasthan Election 2023: રાજસ્થાનમાં ભારતીય જનતા પાર્ટીએ પ્રચંડ જીત નોંધાવી છે. ભાજપના વિજેતા ઉમેદવારોમાં સાંસદ બાબા બાલકનાથનું નામ પણ સામેલ છે. હવે નવા ચૂંટાયેલા ધારાસભ્ય બાબા બાલકનાથે તેમના લોકસભાના સભ્યપદેથી રાજીનામું આપી દીધું છે. રાજસ્થાનની સાથે જ ત્રણ રાજ્યોમાં મુખ્યમંત્રીના નામની ચર્ચા ચાલી રહી છે. આમાં બાબા બાલકનાથનું નામ પણ સામેલ છે. બાબા બાલકનાથના સંસદ સભ્યપદેથી રાજીનામું આપ્યા બાદ ફરી એકવાર ચર્ચાનું બજાર ગરમાયું છે. મહંત બાલકનાથના રાજીનામા બાદ એક વાત તો નક્કી થઈ ગઈ છે કે તેઓ હવે રાજસ્થાન વિધાનસભામાં હાજર રહેશે.