રશિયામાં પેલેસ્ટાઈન સમર્થકોએ રનવે પર કબ્જો કર્યો, વિમાનમાં યહૂદીઓને શોધવા લાગ્યા, એરપોર્ટ બંધ

અરપોર્ટ ટર્મિનલમાં ઘુસીને કરી તોડફોડ

સ્થાનિક મીડિયાના અહેવાલો અનુસાર, આ લોકો ગાઝામાં ઈઝરાયેલની કાર્યવાહીની નિંદા કરવા માટે એકઠા થયા હતા. દેખાવકારોનો એક વીડિયો પણ સામે આવ્યો છે, જેમાં પ્રદર્શનકારીઓના મોટા જૂથો એર ટર્મિનલમાં પ્રવેશતા અને પછી અંદરના તમામ રૂમને તોડી નાખતા જોઈ શકાય છે. વિરોધીઓએ પેલેસ્ટિનિયન ધ્વજ લહેરાવતા અને “અલ્લાહુ અકબર” ના નારા લગાવતા એરપોર્ટ બિલ્ડીંગ પર હુમલો કર્યો. અહીં તેઓએ યહુદી વિરોધી સૂત્રોચ્ચાર કર્યા અને તેલ અવીવ, ઈઝરાયેલથી આવતી ફ્લાઇટ્સ પર આવતા મુસાફરોની શોધ કરી.

વીડિયોમાં દેખાઈ રહ્યું છે કે પ્રદર્શનકારીઓ બળજબરીથી દરવાજો ખોલી રહ્યા છે, કેમેરાની પાછળનો વ્યક્તિ અભદ્ર ભાષામાં બૂમો પાડી રહ્યો છે અને દરવાજા ખોલવાનું કહી રહ્યો છે. આ દરમિયાન તે એરપોર્ટ કર્મચારીઓ પર ગુસ્સે થઈ રહ્યો છે. એક મહિલા રશિયનમાં કહી રહી છે, “અહીં કોઈ ઈઝરાયલી નથી.” ઘણા મીડિયા રિપોર્ટ્સમાં દાવો કરવામાં આવી રહ્યો છે કે પ્રદર્શનકારીઓનો ઉદ્દેશ્ય ઇઝરાયેલના નાગરિકો પર હુમલો કરવાનો હતો.

20થી વધુ લોકો હુમલામાં ઈજાગ્રસ્ત

દાગેસ્તાનના આરોગ્ય મંત્રાલયે જણાવ્યું હતું કે, 20 થી વધુ લોકો ઘાયલ થયા છે, જેમાંથી બેની હાલત ગંભીર છે. તેમાં કહેવામાં આવ્યું છે કે ઘાયલોમાં પોલીસ અધિકારીઓ અને નાગરિકોનો સમાવેશ થાય છે. આંદોલનકારીઓ સામે કાર્યવાહી ચાલુ છે.

ઈઝરાયલે યહૂદીઓની સુરક્ષા કરવા વિનંતી કરી

બીજી તરફ, પરિસ્થિતિને જોતા, ઈઝરાયેલે રશિયન સત્તાવાળાઓને ઇઝરાયેલ અને યહૂદીઓની સુરક્ષા કરવા વિનંતી કરી. જેરુસલેમમાં વિદેશ મંત્રાલયના એક નિવેદનમાં કહેવામાં આવ્યું છે કે મોસ્કોમાં ઇઝરાયેલના રાજદૂત રશિયન અધિકારીઓ સાથે કામ કરી રહ્યા છે. નિવેદનમાં કહેવામાં આવ્યું છે કે, “ઈઝરાયેલ ઈઝરાયેલી નાગરિકો અને યહૂદીઓને ક્યાંય પણ નુકસાન પહોંચાડવાના પ્રયાસોને ગંભીરતાથી લે છે.”

સ્ટેટ ડિપાર્ટમેન્ટના નિવેદનમાં જણાવાયું છે કે, “ઈઝરાયેલ અપેક્ષા રાખે છે કે રશિયન કાયદા અમલીકરણ સત્તાવાળાઓ ઈઝરાયેલના તમામ નાગરિકો અને યહૂદીઓનું રક્ષણ કરે, પછી ભલે તેઓ ગમે તે હોય, અને તોફાનીઓ અને યહૂદીઓ અને ઈઝરાયેલીઓ વિરુદ્ધ બેલગામ ઉશ્કેરણી સામે કડક પગલાં લે.”