સિમ કાર્ડ વેચવાના નિયમો વધુ આકરા થયા, પોલીસ વેરિફિકેશન ફરજિયાત, 67,000 ડિલરોને કરાયા બ્લેકલિસ્ટ

નવા સિમ કાર્ડને લઈને સરકાર દ્વારા નવી ગાઈડલાઈન જારી કરવામાં આવી છે. સરકારના જણાવ્યા અનુસાર, અત્યાર સુધીમાં 52 લાખ મોબાઈલ કનેક્શન બંધ કરવામાં આવ્યા છે, જ્યારે 67,000 ડીલરોને બ્લેકલિસ્ટ કરવામાં આવ્યા છે. મે 2023 થી સિમ કાર્ડ ડીલરો વિરુદ્ધ 300 FIR નોંધવામાં આવી છે. નકલી સિમ કાર્ડ રેકેટમાં સંડોવાયેલા લગભગ 66,000 વોટ્સએપ એકાઉન્ટને પણ બ્લોક કરી દેવામાં આવ્યા છે.

નવી ગાઈડલાઈન મુજબ પોલીસ વેરિફિકેશન વગર સિમ કાર્ડ વેચવા પર 10 લાખ રૂપિયા સુધીનો દંડ થઈ શકે છે. ટેલિકોમ મંત્રીના જણાવ્યા અનુસાર, દેશમાં લગભગ 10 લાખ સિમ કાર્ડ ડીલર્સ છે જેમણે પોલીસ વેરિફિકેશન કરાવવું પડશે. આ સિવાય બિઝનેસ (દુકાન)નું કેવાયસી પણ કરવું પડશે.

એક જ આધાર કાર્ડ પર 658 સિમ કાર્ડ ચાલતા હતા
દેશમાં દરરોજ સિમ કાર્ડ કૌભાંડનો પર્દાફાશ થઈ રહ્યો છે. તાજેતરમાં, પોલીસે એક છેતરપિંડીનો પર્દાફાશ કર્યો છે જેમાં આધાર કાર્ડનો દુરુપયોગ કરવામાં આવી રહ્યો હતો. પોલીસના જણાવ્યા અનુસાર, એક આધાર કાર્ડ પર 658 સિમ કાર્ડ આપવામાં આવ્યા હતા અને આ તમામ સિમ કાર્ડનો ઉપયોગ કરવામાં આવી રહ્યો હતો.

તમિલનાડુની સાયબર ક્રાઈમ વિંગે આ અઠવાડિયે એક વ્યક્તિ પાસેથી સમાન આધાર નંબર પર 100-150 સિમ કાર્ડ રિકવર કર્યા છે. છેલ્લા ચાર મહિનામાં, તમિલનાડુની સાયબર ક્રાઈમ વિંગે છેતરપિંડી પ્રવૃત્તિઓની શંકાના આધારે સમગ્ર તમિલનાડુમાં 25,135 સિમ કાર્ડ બ્લોક કર્યા છે.

વિજયવાડામાં અન્ય એક કિસ્સામાં, એક ફોટો ઓળખ સાથે 658 સિમ કાર્ડ જારી કરવામાં આવ્યા હતા. તમામ સિમ કાર્ડ પોલુકોંડા નવીનના નામે રજીસ્ટર કરવામાં આવ્યા હતા, જેઓ મોબાઈલ શોપ અને અન્ય કિઓસ્ક પર સિમનું વિતરણ કરે છે જ્યાંથી કોઈ સિમ કાર્ડ ખરીદી શકે છે. પોલીસે સંબંધિત ટેલિકોમ કંપનીને તમામ સિમ બ્લોક કરવાનો આદેશ આપ્યો છે.