હર્ષદ રિબડીયાના રાજીનામા અંગે વિપક્ષ નેતા સુખરામ રાઠવાએ આપી પ્રતિક્રિયા, જાણો શું કહ્યું

વિપક્ષ નેતા સુખરામ રાઠવાએ પ્રતિક્રિયા આપતા કહ્યું કે, કોંગ્રેસ બધાને સાથે રાખી ચાલનારો પક્ષ છે. કોઈના મનમાં કે કોઈના પેટમાં ઉતરી વાત કાઢવી મારા માટે અશક્ય છે. પણ જે સાથે છે એ ના જાય તેની કાળજી રાખવાની છે. બચ્યા છે તે ન જાય તે જોવાનું છે. ભાજપ જે વહીવટ કરે છે તે ધારાસભ્ય કે મંત્રી નથી કરતાં તે અધિકારીઓ વહીવટ કરે છે અને એવા વહીવટને કારણે ગામડાંની પ્રજા ત્રાસી ગઈ છે. કચેરીના ધરમ ધક્કા ખાઈ થાકી ગઈ છે. કેટલાક ધારાસભ્ય પર સામાજિક દબાણ લાવી અથવા ખરીદી લે છે. ગુજરાતની જનતાને સારો વહીવટ મળે તે વાત બાજુ પર રહી જાય છે. આવનાર ચૂંટણીમાં અમે યુવાનોને સાથે રાખી પરિવર્તન લાવવા કટિબદ્ધ છીએ.

જેટલા ધારાસભ્ય બચ્યા તેને સાચવશું
વિપક્ષ નેતા સુખરામ રાઠવાએ કહ્યું કે, હર્ષદભાઈ ખેડૂત છે. તેના જવાથી થોડું દુખ છે. હર્ષદભાઈ ખમતીધર ખેડૂત છે. આ મોટો પક્ષ છે. તેની જગ્યા ભરાઈ જશે. અમારામાં ત્રુટિ રહી ગઈ છે તે દૂર કરવાના પ્રયત્ન કરીશું . જેટલા ધારાસભ્ય રહ્યા છે તેને બચાવવાનો પ્રયત્ન કરીશું.