મણિપુરમાં બે વિદ્યાર્થીઓની હત્યા બાદ ફરી હિંસા ભડકી, CM બીરેન સિંહનું ઘર સળગાવવાનો પ્રયાસ

મણિપુરના CMનું ઘર સળગાવવાનો પ્રયાસ

ગુરુવારે, મુખ્યપ્રધાન એન બિરેન સિંહના પૈતૃક નિવાસસ્થાન તરફ કૂચ કરવા માટે ઇમ્ફાલ પૂર્વના હેંગિંગ વિસ્તારમાં મોટી સંખ્યામાં વિરોધીઓ એકઠા થયા હતા. પરંતુ સુરક્ષા દળોએ તેમને રોક્યા હતા. એક પોલીસ અધિકારીએ જણાવ્યું કે, ઇમ્ફાલના હેંગિંગમાં મુખ્યમંત્રી બિરેન સિંહના પૈતૃક નિવાસસ્થાન પર હુમલો કરવાનો પ્રયાસ કરવામાં આવ્યો હતો. પરંતુ સુરક્ષા દળોએ દેખાવકારોને નિવાસસ્થાનથી લગભગ 100 મીટર પહેલા જ અટકાવ્યા હતા.

આના એક દિવસ પહેલા થોબલ જિલ્લામાં પણ હિંસક પ્રદર્શનો થયા હતા. તે દરમિયાન વિરોધ કરી રહેલા ટોળાએ ભાજપ કાર્યાલય પર પહોંચી તેનો ગેટ તોડી નાખ્યો હતો. આ પછી તેઓએ બારીઓ તોડીને આગ લગાવી દીધી. જોકે થોડી જ વારમાં સુરક્ષા દળોએ તેમનો ભગાવી દીધા હતા.

જ્ઞાતિ તણાવ વચ્ચે ભાજપ કાર્યાલય પર હુમલો થયો હોય તેવી આ પહેલી ઘટના નથી. જૂનની શરૂઆતમાં, બદમાશોએ થૌબલ જિલ્લામાં ભાજપની ત્રણ ઓફિસોમાં તોડફોડ કરી હતી. આ દરમિયાન ટોળાએ ઓફિસનો ગેટ, બારીઓ અને પરિસરમાં પાર્ક કરેલી કારના કાચ તોડી નાખ્યા હતા.

શું છે લાપતા વિદ્યાર્થીઓના મોતનો મામલો?

6 જુલાઈથી ગુમ થયેલા બે વિદ્યાર્થીઓની હત્યાના વિરોધમાં સ્થાનિક લોકોએ પ્રદર્શન કર્યું હતું. દરમિયાન મંગળવારે રાત્રે સ્થાનિક પ્રદર્શનકારીઓ અને આરએએફ સુરક્ષાકર્મીઓ વચ્ચે ઘર્ષણ થયું હતું. ભીડને કાબૂમાં લેવા માટે સુરક્ષા દળોએ ટીયર ગેસના શેલ છોડ્યા અને દેખાવકારો પર લાઠીચાર્જ કર્યો. આ ઘટનામાં 45 લોકો ઘાયલ થયા છે, જેમાંથી મોટાભાગના વિદ્યાર્થીઓ છે.

બંને વિદ્યાર્થીઓની હત્યાની તપાસ સીબીઆઈને સોંપવામાં આવી છે. સીબીઆઈ ડાયરેક્ટર અજય ભટનાગર બુધવારે તેમની ટીમ સાથે ઈમ્ફાફાલ પહોંચ્યા હતા. મુખ્યમંત્રી બિરેન સિંહ આ મામલે કેન્દ્રીય ગૃહ મંત્રી અમિત શાહના સતત સંપર્કમાં છે.

સુરક્ષા કર્મચારીઓને એલર્ટ પર રાખવામાં આવ્યા

રાજ્યમાં સંભવિત વિરોધ અને હિંસાનો સામનો કરવા માટે મણિપુર પોલીસ, CRPF અને RAFના જવાનોને ઈમ્ફાલ ખીણમાં તૈનાત કરવામાં આવ્યા છે. એક અધિકારીએ જણાવ્યું કે કોઈપણ અપ્રિય ઘટનાને પહોંચી વળવા માટે સુરક્ષા વ્યવસ્થા સઘન કરવામાં આવી છે. રાજ્ય સરકારે કાયદો અને વ્યવસ્થા જાળવવા માટે 27 અને 29 સપ્ટેમ્બરે તમામ શાળાઓ બંધ રાખવાનો આદેશ આપ્યો છે. રાજ્યમાં અથડામણ પછી, સરકારે તાત્કાલિક અસરથી ઇન્ટરનેટ મોબાઇલ સેવાઓ પર પ્રતિબંધ મૂક્યો હતો. આ પ્રતિબંધ 1 ઓક્ટોબર સુધી ચાલુ રહેશે.

જો કે, સરકારે દવાઓ અને આવશ્યક ચીજવસ્તુઓની ખરીદીને ધ્યાનમાં રાખીને કર્ફ્યુના નિયંત્રણો હળવા કર્યા છે. સોશિયલ મીડિયા પ્લેટફોર્મ પર મેઇતી સમુદાયના બે વિદ્યાર્થીઓના મૃતદેહોની તસવીરો વાયરલ થયા બાદ મંગળવારે ઇમ્ફાલમાં વ્યાપક આક્રોશ ફેલાયો હતો. આ પછી, મણિપુર સરકારે રાજ્યમાં ઇન્ટરનેટ સેવાઓને અસ્થાયી રૂપે બંધ કરવાનો આદેશ આપ્યો.

તમને જણાવી દઈએ કે મંગળવારે, મણિપુરના બે વિદ્યાર્થીઓની તસવીરો વાયરલ થઈ હતી, જેઓ 6 જુલાઈથી ગુમ થયા હતા. તસવીરોમાં વિદ્યાર્થીઓને જમીન પર બેઠેલા બતાવવામાં આવ્યા છે, જ્યારે તેમની પાછળ બે હથિયારધારી માણસો જોઈ શકાય છે. સોશિયલ મીડિયા પર વાયરલ થયેલી અન્ય એક તસવીરમાં બંને વિદ્યાર્થીઓના મૃતદેહ જોઈ શકાય છે. વિદ્યાર્થીઓની ઓળખ 17 વર્ષીય હિઝામ લિન્થોઈંગામ્બી અને 20 વર્ષીય ફિઝામ હેમજીત તરીકે થઈ છે.