Ravi Uppal detained: દુબઈથી ઝડપાયો Mahadev Betting Appનો કો-ફાઉન્ડર, ભારતીય એજન્સીઓ UAEના અધિકારીઓના સંપર્કમાં

Mahadev Betting App Case: મહાદેવ સટ્ટાબાજી એપ કેસના બે મુખ્ય આરોપીઓમાંથી એક રવિ ઉપ્પલની દુબઈમાં ધરપકડ કરવામાં આવી છે. સત્તાવાર સૂત્રોના જણાવ્યા અનુસાર, દુબઈ પોલીસે આ કાર્યવાહી ઈડીની અપીલ પર ઈન્ટરપોલ દ્વારા જાહેર કરવામાં આવેલી રેડ કોર્નર નોટિસના આધારે કરી છે. સૂત્રોના જણાવ્યા અનુસાર, રવિ ઉપ્પલની ગત સપ્તાહે દુબઈમાં અટકાયત કરવામાં આવી હતી અને EDના અધિકારીઓ તેને ભારત લાવવા માટે દુબઈના અધિકારીઓના સંપર્કમાં છે. છત્તીસગઢ અને મુંબઈ પોલીસ રવિ ઉપ્પલ વિરુદ્ધ તપાસ કરી રહી છે. જ્યારે ED મહાદેવ સટ્ટાબાજી એપ સાથે સંબંધિત મની લોન્ડરિંગ કેસની તપાસ કરી રહી છે. રવિ મહાદેવ એપ કેસનો મુખ્ય આરોપી સૌરવ ચંદ્રાકરનો સહયોગી છે.

ભારતમાં પ્રતિબંધ, અન્ય દેશોમાં ચાલી રહી છે એપ

મહાદેવ બુક એપ સટ્ટાબાજી માટે ઓનલાઈન પ્લેટફોર્મ પૂરું પાડે છે. ભારતમાં તેના પર પ્રતિબંધ મૂકવામાં આવ્યો છે. પરંતુ આ એપ અન્ય દેશોમાં ચાલી રહી છે. છત્તીસગઢનો રહેવાસી સૌરવ ચંદ્રાકર અને તેનો સહયોગી રવિ ઉપ્પલ દુબઈથી તેને ચલાવે છે. બંને સામે લુક આઉટ સર્ક્યુલર જાહેર કરવામાં આવ્યો હતો.

જ્યુસ સેન્ટર ચલાવતો હતો સૌરવ

સૌરવ ચંદ્રાકર પહેલા રાયપુરમાં એક જ્યુસ સેન્ટર ચલાવતો હતો. આ પછી તે સટ્ટાબાજીમાં સામેલ થઈ ગયો. સૌરવ અને રવિ પાસે 6000 કરોડથી વધુની સંપત્તિ હોવાની શંકા છે. હવાલા મારફતે મોટી રકમ દુબઈ મોકલવામાં આવી છે. એજન્સીઓને શંકા છે કે આટલા મોટા પાયે મહાદેવ બુક એપને દુબઈથી ઓપરેટ કરવામાં દાઉદ ઈબ્રાહિમ ગેંગે મદદ કરી હતી.

સટ્ટાબાજી માટે પૂરુ પાડે છે ઓનલાઈન પ્લેટફોર્મ

EDની તપાસમાં સામે આવ્યું છે કે મહાદેવ ઓનલાઈન બુક પોકર, કાર્ડ ગેમ, ચાન્સ ગેમ્સ, ક્રિકેટ, બેડમિન્ટન, ટેનિસ, ફૂટબોલ વગેરે જેવી લાઈવ ગેમ્સ પર સટ્ટાબાજી માટે ઓનલાઈન પ્લેટફોર્મ પૂરું પાડે છે. આ એપ તીન પત્તી, પોકર જેવી ઘણી કાર્ડ ગેમ રમવાની સુવિધા પણ પૂરી પાડે છે.

ભૂપેશ બઘેલ પર લાગ્યા હતા ગંભીર આરોપો

મહાદેવ એપ કેસમાં છત્તીસગઢના પૂર્વ સીએમ ભૂપેશ બઘેલ પર ગંભીર આરોપો લગાવવામાં આવ્યા છે. ED મહાદેવ બુક સામે તપાસ કરી રહી છે. આ વચ્ચે 2 નવેમ્બરના રોજ EDને બાતમી મળી હતી કે 7 અને 17 નવેમ્બર 2023ના રોજ યોજાનારી વિધાનસભાની ચૂંટણીને ધ્યાનમાં રાખીને મહાદેવ એપના પ્રમોટરો દ્વારા મોટી માત્રામાં રોકડ છત્તીસગઢ લઈ જવામાં આવી રહી છે. ઈડીએ હોટેલ ટ્રાઈટન અને અન્ય સ્થળો પર સર્ચ હાથ ધર્યું હતું. આ દરમિયાન ઈડીએ 5 કરોડ રૂપિયાની વસૂલાત કરી હતી. આ દરમિયાન EDએ અસીમ દાસની ધરપકડ કરી હતી. અસીમ દાસે સ્વીકાર્યું છે કે જપ્ત કરાયેલ રકમ મહાદેવ એપ પ્રમોટર્સ દ્વારા છત્તીસગઢ રાજ્યમાં યોજાનારી વિધાનસભાની ચૂંટણીમાં ખર્ચ કરવા માટે એક રાજનેતા ‘બઘેલ’ને આપવાની વ્યવસ્થા કરવામાં આવી હતી. EDએ મહાદેવ એપના કેટલાક બેનામી બેંક એકાઉન્ટ પણ શોધી કાઢ્યા છે જેમાં 15.59 કરોડ રૂપિયાની રકમ ફ્રીઝ કરવામાં આવી છે.