ખાલિસ્તાની આતંકી પન્નુની ધમકી, વીડિયો જારી કરીને કહ્યું- એર ઈન્ડિયાના વિમાનમાં 19 નવેમ્બરે…

સોશિયલ મીડિયા પર વીડિયો શેર કરતી વખતે પન્નુએ કહ્યું કે, અમે શીખ લોકોને 19 નવેમ્બરે એર ઈન્ડિયાની ફ્લાઈટમાં મુસાફરી ન કરવા કહીએ છીએ. આ વૈશ્વિક નાકાબંધી હશે. તેણે કહ્યું કે 19મી નવેમ્બરે એર ઈન્ડિયામાં મુસાફરી ન કરો, નહીં તો તમારો જીવ જોખમમાં મુકાઈ જશે. પન્નુએ વધુમાં દાવો કર્યો કે દિલ્હીનું ઈન્દિરા ગાંધી ઈન્ટરનેશનલ (IGI) એરપોર્ટ 19 નવેમ્બરે બંધ રહેશે અને તેનું નામ બદલવામાં આવશે.

પ્રતિબંધિત યુએસ સ્થિત શીખ્સ ફોર જસ્ટિસ સંસ્થાના વડા પન્નુએ 10 ઓક્ટોબરે વડાપ્રધાન નરેન્દ્ર મોદીને ઈઝરાયેલ-પેલેસ્ટાઈન યુદ્ધમાંથી શીખવાની ધમકી આપી હતી, જેથી ભારતમાં આ પ્રકારની પ્રતિક્રિયા ન થાય. પન્નુએ અગાઉના વીડિયોમાં કહ્યું હતું કે પંજાબથી લઈને પેલેસ્ટાઈન સુધીના ગેરકાયદેસર કબજાના લોકો આની આકરી પ્રતિક્રિયા આપશે, જે હિંસા તરફ દોરી જશે. ખાલિસ્તાની આતંકવાદીએ કહ્યું હતું કે, તેનું સંગઠન SFJ ‘બેલેટ અને વોટ’માં માને છે અને દાવો કર્યો હતો કે “પંજાબની મુક્તિ નિશ્ચિત છે.” કેમેરા તરફ ઈશારો કરીને પન્નુ વીડિયોમાં કહે છે, “ભારત, પસંદગી તમારી છે. બેલેટ કે બુલેટ.”

પન્નુ વિરુદ્ધ દેશભરમાં 16 કેસ નોંધાયા છે

શીખ ફોર જસ્ટિસ સંસ્થાના વડા પન્નુ ભારતનો વોન્ટેડ આતંકવાદી છે. તેની સામે દેશભરમાં 16 કેસ નોંધાયેલા છે. તેની સામે દિલ્હી, પંજાબ, હિમાચલ પ્રદેશ, હરિયાણા અને ઉત્તરાખંડમાં ખાલિસ્તાની ચળવળને લઈને આ કેસ નોંધવામાં આવ્યા છે. પંજાબના સરહિંદમાં તેની સામે UAPA હેઠળ કેસ નોંધવામાં આવ્યો છે. જ્યારે અમૃતસરમાં UAPA હેઠળ 4 કેસ, દિલ્હીમાં UAPA હેઠળ 4 કેસ, ગુરુગ્રામમાં UAPA હેઠળ કેસ, NIA દ્વારા UAPA હેઠળ કેસ, ધર્મશાલામાં UAPA હેઠળ કેસ નોંધાયેલા છે. આ રીતે, તેને UAPA એટલે કે ગેરકાનૂની પ્રવૃત્તિઓ (નિવારણ) અધિનિયમ હેઠળ કુલ 9 કેસમાં આરોપી ગણવામાં આવ્યો છે.

કોણ છે આતંકવાદી પન્નુ?

ગુરપતવંત સિંહ પન્નુનો જન્મ પંજાબમાં થયો હતો. અભ્યાસ પણ અહીંથી જ કર્યો. હાલમાં વિદેશમાં છે. ક્યારેક તે કેનેડામાં રહે છે તો ક્યારેક અમેરિકામાં. ભારતમાં બહારથી આતંકવાદી હુમલા કરવાની ધમકી આપે છે. કેનેડામાં સ્થાયી થયેલા હિન્દુઓને ધમકી આપે છે અને આ બધું તે ખુલ્લેઆમ કરે છે. પન્નુનો જન્મ 14 ફેબ્રુઆરી 1967ના રોજ થયો હતો. પન્નુના પિતા પંજાબમાં એક કંપનીમાં કામ કરતા હતા. તેનો એક ભાઈ પણ છે, જે વિદેશમાં રહે છે. તેના માતા-પિતા મૃત્યુ પામ્યા છે. પન્નુએ પંજાબ યુનિવર્સિટી, ચંદીગઢમાંથી કાયદાનો અભ્યાસ કર્યો છે. હાલમાં તેઓ અમેરિકામાં કાયદાની પ્રેક્ટિસ કરી રહ્યો છે. પન્નુએ 2007માં ‘શીખ ફોર જસ્ટિસ’ નામનું સંગઠન બનાવ્યું હતું. જુલાઈ 2020માં ભારતે પન્નુને આતંકવાદી જાહેર કર્યો હતો. પન્નુ આઈએસઆઈની મદદથી ખાલિસ્તાન અભિયાન ચલાવી રહ્યો છે.