PM મોદી પર કેજરીવાલનો પ્રહાર ‘વડાપ્રધાન ઈન્દિરા ગાંધીની જેમ અતિ કરી રહ્યા છે!’

સિસોદિયાની ધરપકડ બાદ કેજરીવાલ અને આપની સ્થિતિ વિકટ
મનીષ સિસોદિયાની ધરપકડ બાદ દિલ્હીના રાજકારણમાં મોટો રાજકીય ગરમાવો શરૂ થઈ ગયો છે. મુખ્યમંત્રી અરવિંદ કેજરીવાલે ભાજપ પર આકરા પ્રહારો કર્યા છે. તેમના તરફથી વડાપ્રધાન નરેન્દ્ર મોદીની સરખામણી ઈન્દિરા ગાંધી સાથે કરવામાં આવી છે. પીએમ આ સમયે ઈન્દિરા ગાંધીની જેમ અતિ કરી રહ્યા છે.

AAPનું તોફાન અટકવાનું નથી
કેજરીવાલે કહ્યું કે, મેં હજારો લોકો સાથે વાત કરી, જનતામાં ઘણો ગુસ્સો છે. જનતા કહી રહી છે કે, ભાજપના લોકો શું કરી રહ્યા છે. તેઓ જેને ઈચ્છે છે, તેમને જેલમાં ધકેલી દે છે. તેઓ આમ આદમી પાર્ટીને રોકવા માંગે છે. જ્યારથી તેઓ પંજાબ જીતી ગયા છે, તેઓ તેને સહન કરવા મુશ્કેલ બન્યા છે. આમ આદમી પાર્ટી તોફાન છે. આ હવે અટકવાનું નથી. આમ આદમી પાર્ટીનો સમય આવી ગયો છે. અમે ડોર ટુ ડોર અભિયાન ચલાવીશું. એક સમયે ઈન્દિરા ગાંધીએ અતિ કરી હતી. હવે વડાપ્રધાન કરી રહ્યા છે. ઉપરવાળો તેની સાવરણી ચલાવશે.

જે મંત્રીઓએ દેશનું નામ રોશન કર્યું તેમની જ ધરપકડ
કેજરીવાલે એ પણ ભાર મૂક્યો કે, મનીષ સિસોદિયાએ શિક્ષણ ક્ષેત્રે કરેલા ઉત્કૃષ્ટ કાર્યને કારણે તેમની ધરપકડ કરવામાં આવી છે. તેઓ કહે છે કે દેશને આ બે મંત્રીઓ પર ગર્વ છે. આ બંને મંત્રીઓએ દેશનું નામ રોશન કર્યું છે. સત્યેન્દ્ર જૈને વિશ્વને સ્વાસ્થ્યનું નવું મોડેલ આપ્યું. મનીષ સિસોદિયાએ સરકારી શાળાઓનો કાયાકલ્પ કરીને સૌને ચોંકાવી દીધા. સમગ્ર વિશ્વને શિક્ષણનું મોડેલ આપ્યું, જેણે નામના અપાવી, વડાપ્રધાને બંનેને જેલમાં ધકેલી દીધા છે. લિકર પોલિસી માત્ર એક બહાનું છે, બધું જ નકલી છે. પીએમ ઈચ્છે છે કે સારું કામ બંધ થઈ જાય, અમે જે કામ કરી રહ્યા છીએ તે તેઓ કરી શકતા નથી. જ્યાં તેમની સરકાર છે ત્યાં તેઓ એક પણ શાળા સુધારી શક્યા નથી. એક હૉસ્પિટલ ઠીક નથી થઈ, એટલે કેજરીવાલને રોકવાનો પ્રયાસ કરી રહ્યા છે.

બે વિભાગનું શ્રેષ્ઠ કામ, એક જ મંત્રીઓની ધરપકડ
કેજરીવાલે તો ત્યાં સુધી કહ્યું કે, તેમની સરકારે શિક્ષણ અને સ્વાસ્થ્યની દિશામાં શ્રેષ્ઠ કામ કર્યું છે, તેથી જ આ બંને મંત્રાલયના મંત્રીઓની ધરપકડનું કારણ. તેમણે કહ્યું કે આ કોઈ સંયોગ ન હોઈ શકે, સીધું કામ અટકાવવાના પ્રયાસો થઈ રહ્યા છે. હવે આ પહેલીવાર નથી કે, જ્યારે પીએમ મોદી કે ભાજપ અરવિંદ કેજરીવાલના નિશાના પર આવ્યા હોય. દિલ્હીમાં ભાજપ અને આમ આદમી પાર્ટી વચ્ચે શબ્દ યુદ્ધ ચાલી રહ્યું છે. થોડા દિવસો પહેલા સુધી મેયરની ચૂંટણી અને પછી સ્ટેન્ડિંગ કમિટીની ચૂંટણીને લઈને ભારે હોબાળો થયો હતો, હવે સિસોદિયાની ધરપકડથી વિવાદ વધુ વકર્યો છે.