અમેરિકામાં વસતા ભારતીયોએ આ રીતે ઉજવી દિવાળી, સંસ્કૃતની સાથે અંગ્રેજીમાં પણ મંત્રોચ્ચાર થયા

અમેરિકામાં પ્રવાસી ભારતીયોના સંગઠન એસોસિયેશન ઓફ ઈન્ડિયન્સ ઈન અમેરિકા (AIA)ના સહયોગથી આયોજિત દિવાળી કાર્યક્રમની શરૂઆત શાંતિ મંત્રોથી થઈ હતી. પરંતુ ખાસ વાત એ હતી કે આ મંત્રોનો અંગ્રેજીમાં અનુવાદ પણ કરવામાં આવ્યો હતો.

પરંપરાગત રીતે કાર્યક્રમની શરૂઆત દીપ પ્રાગટ્યથી કરવામાં આવી હતી. આ દરમિયાન રાજ્યપાલને ગણેશજીની મૂર્તિ પણ અર્પણ કરવામાં આવી હતી જ્યારે લેફ્ટનન્ટ ગવર્નરને ભગવદ ગીતાની નકલ અર્પણ કરવામાં આવી હતી.

મિનેસોટામાં રહેતા ભારતીયોની સંખ્યા અંદાજે 40,000 છે. અહીં ભારતીય અમેરિકન નાગરિકોના યોગદાનની પ્રશંસા કરતાં ગવર્નર ટિમ વાલ્ઝે કહ્યું કે મિનેસોટામાં ઐતિહાસિક રીતે સૌપ્રથમવાર દિવાળી કાર્યક્રમનું આયોજન કરવામાં આવ્યું છે, જે સમૃદ્ધ સાંસ્કૃતિક વારસાને પ્રતિબિંબિત કરે છે. તે વિવિધતામાં એકતાનું પ્રતિક છે, જેમાં અમેરિકામાં રહેતા NRI મહત્વની ભૂમિકા ભજવે છે.

ઓક્ટોબરને ‘હિન્દુ હેરિટેજ મહિનો’ જાહેર કર્યો

આ સમય દરમિયાન, મિનેસોટાના ગવર્નર વાલ્ઝે દર વર્ષે ઓક્ટોબરને હિન્દુ હેરિટેજ મહિના તરીકે ઉજવવાની જાહેરાત કરી હતી. આ નિર્ણય અમેરિકામાં વસતા હિંદુ, શીખ, જૈન અને બૌદ્ધોની મોટી સંખ્યાને ધ્યાનમાં રાખીને લેવામાં આવ્યો છે. વિજ્ઞાન, શિક્ષણ, ચિકિત્સા, કાયદો, રાજકારણ, વેપાર, ટેકનોલોજી અને રમતગમત જેવા ક્ષેત્રોમાં ભારતીય મૂળના અમેરિકન નાગરિકોનું યોગદાન આમાં મહત્ત્વની ભૂમિકા ધરાવે છે.

ગણેશની મૂર્તિ ભેટ સ્વરૂપે પ્રાપ્ત કરવા પર રાજ્યપાલે કહ્યું કે હવેથી આ મૂર્તિ હંમેશા ગવર્નર હાઉસમાં રહેશે કારણ કે તે મિનેસોટામાં પ્રથમ વખત ઉજવવામાં આવેલી દિવાળીનું પ્રતીક છે.

વ્હાઇટ હાઉસમાં 2003થી દિવાળીની ઉજવણી થાય છે

AIA ની મદદથી, 1987 માં ન્યૂયોર્ક શહેરમાં પ્રથમ દિવાળી કાર્યક્રમનું આયોજન કરવામાં આવ્યું હતું. ત્યારથી ન્યૂયોર્કમાં દિવાળી ખૂબ જ ધામધૂમથી ઉજવવામાં આવે છે. 2003માં તત્કાલિન અમેરિકી રાષ્ટ્રપતિ જ્યોર્જ ડબલ્યુ બુશે વ્હાઇટ હાઉસમાં દિવાળીની પરંપરા શરૂ કરી હતી, જે બાદમાં ઓબામા, ટ્રમ્પ અને બિડેનના કાર્યકાળ દરમિયાન પણ ચાલુ રહી હતી.