કાશ્મીરમાં 3 અધિકારીઓના હત્યારા આતંકીઓનો આજે થશે હિસાબ, સેના-પેરા કમાન્ડોએ કોકરનાગ જંગલને ઘેર્યું

વાસ્તવમાં, મંગળવારે સુરક્ષા દળોને અનંતનાગના કોકરનાગમાં કેટલાક આતંકવાદીઓ છુપાયા હોવાની માહિતી મળી હતી. આ પછી સર્ચ ઓપરેશન હાથ ધરવામાં આવ્યું હતું. મંગળવારની રાત હોવાથી તેને અટકાવી દેવામાં આવી હતી. બુધવારે સુરક્ષાદળોએ આતંકીઓ વિરુદ્ધ સર્ચ ઓપરેશન શરૂ કર્યું હતું. સુરક્ષાદળોએ આતંકીઓને ઘેરી લીધા હતા. સુરક્ષા દળોના અધિકારીઓ જેવા આતંકીઓ જ્યાં છુપાયેલા હતા ત્યાં પહોંચ્યા, આતંકવાદીઓએ અંધાધૂંધ ગોળીબાર કર્યો, ત્યારબાદ એન્કાઉન્ટર શરૂ થયું. આ દરમિયાન આર્મીના કર્નલ મનપ્રીત સિંહ, મેજર આશિષ અને જમ્મુ-કાશ્મીર પોલીસના ડીએસપી હુમાયુ ભટને ગોળી વાગી હતી. ઘાયલ અધિકારીઓને તાત્કાલિક હેલિકોપ્ટર દ્વારા એરલિફ્ટ કરવામાં આવ્યા હતા, પરંતુ આ અધિકારીઓને બચાવી શકાયા ન હતા. બુધવારે ઘાયલ થયેલા એક સૈનિકનું પણ ગુરુવારે મોત થયું હતું.

10 લાખનું ઈનામ ધરાવતો આતંકી છુપાયો છે

આતંકી સંગઠન લશ્કર-એ-તૈયબાની શાખા TRFએ આ આતંકી ઘટનાની જવાબદારી લીધી છે. કહેવામાં આવી રહ્યું છે કે આ હુમલામાં 10 લાખ રૂપિયાનું ઇનામ ધરાવતો આતંકી ઉઝૈર સામેલ છે. સુરક્ષા દળોએ ઉઝૈર સહિત 2-3 આતંકીઓને ઘેરી લીધા છે. આતંકવાદીઓએ પહાડોમાં સંતાયેલા છે. આતંકીઓના લોકેશનને ટ્રેસ કરવા માટે સેના હેલિકોપ્ટર, ક્વોડકોપ્ટર અને ડ્રોનની મદદ લઈ રહી છે. મોટી સંખ્યામાં વિશેષ દળોની ટીમો તૈનાત કરવામાં આવી છે. સુરક્ષા દળોએ તે વિસ્તારને ઘેરી લીધો છે જ્યાં આતંકીઓ છુપાયેલા છે. એવું કહેવામાં આવી રહ્યું છે કે જે આતંકવાદી મોડ્યુલે એપ્રિલમાં પૂંચમાં આર્મીના 5 જવાનો પર હુમલો કર્યો હતો, તેણે જ અનંતનાગમાં હુમલો કર્યો હતો. લશ્કર અને જૈશના આતંકવાદીઓ સાથે મળીને રચાયેલું આ નવું આતંકવાદી મોડ્યુલ 6 મહિનાથી ઘાટીમાં સક્રિય છે.

જમ્મુ અને કાશ્મીર પોલીસે ગુરુવારે ટ્વીટ કર્યું, “કર્નલ મનપ્રીત સિંહ, મેજર આશિષ અને ડીએસપી હુમાયુ ભટની અતૂટ બહાદુરીને સાચી શ્રદ્ધાંજલિ, જેમણે આ ચાલુ ઓપરેશન દરમિયાન આગળથી નેતૃત્વ કરતી વખતે તેમના જીવનનું બલિદાન આપ્યું.” અમારા દળો ઉઝૈર ખાન સહિત લશ્કરના બંને આતંકવાદીઓને ઘેરી લેવાના સંકલ્પ સાથે જોડાયેલી છે. ઉઝૈર ખાન 10 લાખ રૂપિયાનું ઇનામ ધરાવતો આતંકવાદી છે. તે ખીણમાં જુલાઈ 2022 થી સક્રિય છે.

સેનાએ આધુનિક હથિયારો તૈનાત કર્યા

કોકરનાગના જંગલોમાં મોટી સંખ્યામાં સુરક્ષાદળોએ પડાવ નાખ્યો છે. ગુરુવારે સવારે જંગલોમાં સર્ચ ઓપરેશન ફરી શરૂ કરવામાં આવ્યું હતું. ગુરુવારે વહેલી સવારે એન્કાઉન્ટર વિસ્તારમાંથી ત્રણ વિસ્ફોટના અવાજ સંભળાયા હતા. ડીજીપી દિલબાગ સિંહે કહ્યું કે, અમે આતંકીઓને ઘેરી લીધા છે. તેમને બક્ષવામાં આવશે નહીં. અમારા સૈનિકો ઓપરેશનને જલ્દી ખતમ કરવાના તમામ પ્રયાસો કરી રહ્યા છે. આ ઓપરેશનમાં નવી પેઢીના તમામ હથિયારો અને સાધનોનો ઉપયોગ કરવામાં આવી રહ્યો છે. ડ્રોનથી લઈને હેલિકોપ્ટરનો ઉપયોગ થઈ રહ્યો છે.