મુખ્યમંત્રી-મંત્રીના નામ પર કેવી રીતે ચોંકાવી દે છે BJP? 2019માં ખુદ PM મોદીએ ખોલ્યું હતું રાજ

મધ્યપ્રદેશમાં મોહન યાદવની મુખ્યમંત્રી તરીકે પસંદગી કરીને ભારતીય જનતા પાર્ટીએ ફરી એકવાર બધાને ચોંકાવી દીધા છે. મોહન યાદવનું નામ ક્યાંય ચર્ચામાં નહોતું. પરંતુ સાંજે તેઓ મધ્યપ્રદેશમાં ભાજપ ધારાસભ્ય દળના નેતા તરીકે ચૂંટાયા હતા. મુખ્યમંત્રી અને મંત્રીઓના નામ પર ચોંકાવવાનો સિલસિલો હવે ભાજપ માટે કોઈ નવી વાત રહી નથી. રસપ્રદ વાત તો એ છે કે ખુદ વડાપ્રધાન નરેન્દ્ર મોદીએ વર્ષ 2019માં એક મોટું રહસ્ય ખોલ્યું હતું. ત્યારે પીએમ મોદીએ સ્પષ્ટ કહ્યું હતું કે જેમનું નામ મીડિયામાં ચાલી રહ્યું છે, જેમના નામથી હેડલાઈન્સ બની રહી છે, તો સમજી લેવું કે તેઓ પહેલા જ રેસમાંથી બહાર થઈ ચૂક્યા છે. આમ તો પીએમ મોદીએ લોકસભાની ચૂંટણી બાદ સાંસદોને સંબોધિત કરતી વખતે આ વાત કહી હતી, પરંતુ આનાથી ભાજપમાં મુખ્યમંત્રી, મંત્રી અથવા અન્ય મોટા હોદ્દાઓમાં પર પસંદગીની રણનીતિ અંગે સ્પષ્ટ સંકેત મળી જાય છે.