‘બહાર નીકળતા જ આતંકીઓ શૂટ કરી દે છે’, ઈઝરાયલમાં ફસાયેલી ગુજરાતી મહિલાએ વર્ણવી ત્યાં સ્થિતિ

‘આતંકીઓ લોકોને જોતા જ ગોળી મારે છે’

રાજકોટના સોનલબેન ગેડિયાએ ઈઝરાયલમાંથી વીડિયો બનાવીને સોશિયલ મીડિયામાં વાઈરલ કર્યો છે. તે કહે છે કે, ત્રાસવાદી સંગઠન રોડ પર કોઈપણ દેશના નાગરિકો પર હુમલો કરે છે. તમે બહાર નીકળ્યા તો ગયા. બાટીયમ સિટીમાં રાત્રે બ્લાસ્ટ થયા હતા પરંતુ અત્યારે શાંતિ છે. હાલમાં બધા નાગરિકો સુરક્ષિત જગ્યાએ છે. ગાઝા તરફથી ધડાકાના અવાજ આવી રહ્યા છે. ઈઝરાયલ સરકારે મુખ્ય રસ્તા અને બજારમાં જવા પર મનાઈ કરી છે.

ઈઝરાયલમાં ફસાયેલી રાજકોટની મહિલાએ યુદ્ધ વચ્ચે ત્યાંની પરિસ્થિતિનો વીડિયો બનાવી લોકોને શું અપીલ કરી?#IsraelPalestineWar #GazaUnderAttack #GujaratiNews pic.twitter.com/fHNpROlfYS

— Gujarat Tak (@GujaratTak) October 9, 2023

શનિવારે હમાસે 5000 રોકેટ છોડ્યા હતા

નોંધનીય છે કે, શનિવારે વહેલી સવારે હમાસ દ્વારા ઈઝરાયલ પર લગભગ 30 મિનિટ સુધી બોમ્બ મારો ચલાવાયો હતો. ઇઝરાયેલના બચાવ જૂથ ‘મેગેન ડેવિડ એડોમ’એ જણાવ્યું છે કે દક્ષિણ ઇઝરાયેલમાં એક ઇમારત પર રોકેટ પડતાં 70 વર્ષની એક મહિલા ગંભીર રીતે ઘાયલ થઇ છે. આ સિવાય એક 20 વર્ષીય યુવકને પણ થોડી ઈજા થઈ છે.પેલેસ્ટાઈન આતંકવાદીઓ દ્વારા ઈઝરાયેલ પર એવા સમયે રોકેટ છોડવામાં આવ્યું છે જ્યારે તાજેતરમાં ગાઝા અને ઈઝરાયેલ વચ્ચે અસ્થિર સરહદ પર અઠવાડિયાથી તણાવનું વાતાવરણ હતું.

પેલેસ્ટિનિયન આતંકવાદી સંગઠન હમાસના નેતા મોહમ્મદ ડેફે એક નિવેદન જારી કરીને કહ્યું હતું કે, હમાસે ઈઝરાયલ વિરુદ્ધ નવું સૈન્ય અભિયાન શરૂ કર્યું છે. આ ઓપરેશનને ‘ઓપરેશન અલ-અક્સા સ્ટોર્મ’ નામ આપવામાં આવ્યું છે. ડેફ અનુસાર, આ ઓપરેશન શરૂ કરવા માટે, હમાસે શનિવારે વહેલી સવારે ઇઝરાયેલ પર 5,000 રોકેટ છોડ્યા છે. ડેફે પોતાના નિવેદનમાં કહ્યું હતું કે, અમે નક્કી કર્યું છે કે હવે બહુ થયું. અમે તમામ પેલેસ્ટાઈનીઓને ઈઝરાયેલનો મુકાબલો કરવા વિનંતી કરીએ છીએ.” ઈઝરાયેલે મોહમ્મદ ડેફને ઘણી વખત મારવાનો પ્રયાસ કર્યો છે પરંતુ તે દરેક વખતે બચી જાય છે.