મેક્સિકોમાં બસ ખીણમાં પડી જતા 18ના મોત, US બોર્ડરે જતી બસમાં ભારતીયો પણ સવાર હતા

તિજુઆના શહેરના બોર્ડર ટાઉન વિસ્તારમાં બસ 42 પેસેન્જરોને લઈને જઈ રહી હતી. બસમાં ભારત, ડોમિનિક રિપબ્લિક અને આફ્રિકન દેશના લોકો સવાર હતા. નાયારીત રાજ્ય સરકાર મુજબ, બસ ડ્રાઈવરને ડિટેઈન કરવામાં આવ્યો છે. અધિકારીઓને આશંકા છે કે વળાંક પર ડ્રાઈવર બસને ઓવરસ્પીડમાં હંકારી રહ્યો હતો. અધિકારીઓએ જણાવ્યું કે, તેઓ હજુ પણ મૃતકોની ઓળખવા તપાસ કરી રહ્યા છે.

રાજ્ય સરકારના નિવેદન મુજબ, 20 જેટલા લોકોને ઈજાઓ પહોંચતા હોસ્પિટલમાં ખસેડવામાં આવ્યા છે. જેમાં એક મહિલાની સ્થિતિ ગંભીર હોવાનું સામે આવી રહ્યું છે. રેસ્ક્યુ અધિકારીએ જણાવ્યું હતું કે, બસ 40 મીટર નીચે ખાબકી હતી, જેના કારણે રેસ્ક્યુ અભિયાન વધુ મુશ્કેલ બની ગયું હતું.

નોંધનીય છે કે, ગત મહિને પણ મેક્સિકોમાં આ પ્રકારની ઘટના બની હતી, જેમાં 29 લોકોના મોત થયા હતા. તો ફેબ્રુઆરીમાં માઈગ્રન્ટ્સને લઈને જતી બસ ક્રેશ થઈ જતા 17 લોકોના મોત થઈ ગયા હતા.