મધ્ય પ્રદેશમાં મોટી દુર્ઘટના, પુલ પરથી બસ નીચે ખાબકી, 15 લોકોના મોત 20થી વધુ ઈજાગ્રસ્ત

મળતી માહિતી મુજબ મંગળવારે સવારે એક બસ ઈન્દોર તરફ જઈ રહી હતી. બસ ખરગોનના ખરગોન ટેમલા રોડ પર દસંગા પાસે પહોંચી ત્યારે ડ્રાઈવરે કાબૂ ગુમાવ્યો હતો. બેકાબૂ બસ પુલ પરથી નીચે પડી હતી. બસ પુલ પરથી નીચે પડી ગયા બાદ જોરદાર અવાજ સાંભળીને આસપાસના ગ્રામજનો ઘટનાસ્થળે દોડી આવ્યા હતા.

સ્થાનિકોએ મુસાફરોને બસમાંથી બહાર કાઢ્યા
ઘટનાસ્થળે પહોંચેલા ગ્રામજનોએ બસમાં ફસાયેલા મુસાફરોને બહાર કાઢવાનું શરૂ કર્યું હતું અને પોલીસને પણ અકસ્માતની જાણ કરી હતી. અકસ્માતની માહિતી મળતાની સાથે જ પોલીસ પણ એક્ટિવ મોડમાં આવી ગઈ હતી. તાત્કાલિક એમ્બ્યુલન્સ ઘટનાસ્થળે રવાના કરવામાં આવી હતી અને પોલીસ ટીમ પણ મોકલવામાં આવી હતી. પોલીસ અને એમ્બ્યુલન્સ ઘટનાસ્થળે પહોંચે તે પહેલા ગ્રામજનોએ ઘણા ઘાયલોને ટ્રેક્ટર ટ્રોલીમાં નજીકની હોસ્પિટલમાં મોકલી દીધા હતા.

15 લોકોના મોત નિપજ્યા
ડોક્ટરોએ 14 લોકોને મૃત જાહેર કર્યા છે જ્યારે 20 લોકો હોસ્પિટલમાં સારવાર હેઠળ છે. આ અંગે ખરગોનના પોલીસ અધિક્ષક (SP) ધરમવીર સિંહે કહ્યું હતું કે, આ અકસ્માતમાં 14 લોકોના મોત થયા છે જ્યારે 20 લોકો ઘાયલ થયા છે. તેમણે જણાવ્યું કે, ઈન્દોર જઈ રહેલી બસમાં લગભગ 50 લોકો હતા. બાદમાં મૃત્યુઆંક વધીને 15 થયો છે.

સરકારે મૃતકોના પરિજનોને સહાયની જાહેરાત કરી
મધ્ય પ્રદેશ સરકારે ખરગોન બસ દુર્ઘટનામાં જીવ ગુમાવનારા લોકોના પરિવારજનોને વળતરની જાહેરાત કરી છે. સરકારે આ દુર્ઘટનામાં જીવ ગુમાવનારા લોકોના પરિવારજનોને 4-4 લાખ રૂપિયાનું વળતર આપવાની જાહેરાત કરી છે. આ અકસ્માતમાં ગંભીર રીતે ઘાયલ થયેલા લોકોને 50 હજાર અને અન્ય ઘાયલોને 25 હજાર રૂપિયા આપવામાં આવશે.