રાહુલ ગાંધીની સંસદમાં ફ્લાઈંગ કિસ, ભાજપની મહિલા સાંસદોએ સ્પીકરને કરી ફરિયાદ

જણાવી દઈએ કે કોંગ્રેસ નેતા રાહુલ ગાંધીએ બુધવારે સાંસદ તરીકે પુનઃસ્થાપિત થયા બાદ પહેલીવાર સંસદમાં પોતાનું ભાષણ આપ્યું હતું. ભાષણ પૂરું કરીને રાહુલ જ્યારે બહાર ફરી રહ્યા હતા ત્યારે આવી ઘટના બની હતી, જેના પર મહિલા સાંસદોએ વાંધો ઉઠાવ્યો હતો. તે સમયે કેન્દ્રીય મંત્રી સ્મૃતિ ઈરાનીનું ભાષણ ચાલી રહ્યું હતું. જોકે, રાહુલની પ્રતિક્રિયાની તે ક્ષણ કેમેરામાં કેદ થઈ નથી.

આ ક્ષણના સાક્ષી રહેલા લોકોના જણાવ્યા અનુસાર, રાહુલ ગાંધી જ્યારે અવિશ્વાસ પ્રસ્તાવના ભાષણ પછી લોકસભા પરિસરમાંથી બહાર નીકળી રહ્યા હતા ત્યારે તેમની કેટલીક ફાઇલો પડી ગઈ હતી. તેઓ તેમને લેવા માટે નીચે ઝૂક્યા કે તરત જ ભાજપના કેટલાક સાંસદો તેમના પર હસવા લાગ્યા. આના પર રાહુલ ગાંધીએ ભાજપના સાંસદોને ફ્લાઈંગ કિસ આપી અને હસતા હસતા બહાર નીકળી ગયા.

‘આવું ઉદાહરણ માત્ર મહિલા વિરોધી જ આપી શકે’

રાહુલની ફ્લાઈંગ કિસને લઈને વિવાદ શરૂ થયો હતો. સંસદમાં ભાષણ દરમિયાન કેન્દ્રીય મહિલા અને બાળ વિકાસ મંત્રી સ્મૃતિ ઈરાનીએ રાહુલ ગાંધી પર નિશાન સાધતા કહ્યું કે, સંસદમાં મહિલા સાંસદોને માત્ર મહિલા વિરોધી વ્યક્તિ જ ફ્લાઈંગ કિસ આપી શકે છે. આવું ઉદાહરણ પહેલા ક્યારેય જોવા મળ્યું નથી. આ બતાવે છે કે તે મહિલાઓ વિશે શું વિચારે છે. આ અભદ્ર છે.

‘લોકસભા અધ્યક્ષને ફરિયાદ’

કેન્દ્રીય કૃષિ મંત્રી શોભા કરંદલાજેએ પણ ફ્લાઈંગ કિસને લઈને કોંગ્રેસના સાંસદ પર નિશાન સાધ્યું હતું. તેમણે રાહુલના વર્તનને ‘અયોગ્ય’ ગણાવ્યું અને લોકસભાના અધ્યક્ષને ફરિયાદ કરી. ફરિયાદ પત્ર પર ઘણી મહિલા સાંસદોએ સહી કરી છે. આ પત્રમાં તેમણે કડક કાર્યવાહીની માંગ કરી છે. સહી કરનાર તમામ મહિલા ભાજપ સાંસદો સ્પીકરના રૂમમાં પહોંચી ગઈ હતી.