અફઘાનિસ્તાનના કાબુલમાં મસ્જિદમાં બોમ્બ બ્લાસ્ટથી 20થી વધુના મોત, 40 લોકો ઘાયલ

તાલિબાને સમગ્ર વિસ્તારને સીલ કર્યો
જાણકારી મુજબ, કાબુલ શહેરના સર-એ-કોટલ ખૈરખાનામાં આ બોમ્બ બ્લાસ્ટ થયો હતો. કાબુલના સિક્યોરિટી ડિપાર્ટમેન્ટ ખાલિદ જરદાને આ બ્લાસ્ટની પુષ્ટિ કરી છે. હાલમાં બ્લાસ્ટ થનારી જગ્યાએ સુરક્ષા ફોર્સ પહોંચી ચૂકી છે. હાલમાં સમગ્ર વિસ્તારને તાલિબાનના સિક્યોરિટી ગાર્ડ્સે સીલ કરી દીધો છે. હાલમાં બ્લાસ્ટની આ ઘટનામાં ઈજાગ્રસ્ત થયેલા લોકોને અલગ-અલગ હોસ્પિટલોમાં સારવાર માટે પહોંચાડવામાં આવી રહ્યા છે.

હુમલાની જવાબદારી કોઈ સંગઠને નથી લીધી
હાલમાં કોઈ સંગઠને આ હુમલાની જવાબદારી લીધી નથી. પરંતુ પાછલા કેટલાક મહિનામાં આ પ્રકારના ઘણા હુમલા થયા છે, જેમાં મસ્જિદને જ ટાર્ગેટ બનાવવામાં આવી છે. પરંતુ આ હુમલામાં એક નવી વાત એ હતી કે, અત્યાર સુધી શિયા મસ્જિદોને આતંકી સંગઠન IS દ્વારા નિશાન બનાવવામાં આવી રહી હતી, પરંતુ આજે જે વિસ્તારમાં બ્લાસ્ટ થયો છે, જ્યાં શિયા વસ્તી નથી રહેતી.

તાલિબાનના શાસનને હાલમાં 1 વર્ષ પૂર્ણ થયું
કાબુલમાં હાલ તાલિબાનની સરકાર છે. થોડા દિવસો પહેલા જ તાલિબાનની સરકારને 1 વર્ષ પૂર્ણ થયું છે. અશરફ ગનીની સરકારને સત્તાથી હટાવીને તાલિબાને ત્યાં કબ્જો કર્યો હતો. કાબુલમાં છેલ્લા કેટલાક મહિનાઓમાં બોમ્બ બ્લાસ્ટની ઘણી ઘટનાઓ બની છે. હાલમાં જ કાબુલની એક મસ્જિદમાં બ્લાસ્ટ થયો હતો, જેમાં 8 લોકોના મોત થયા હતા. આ પહેલા અફઘાનિસ્તાનના ગુરુદ્વારાને પણ ટાર્ગેટ કરવામાં આવ્યા હતા.