જમ્મુ-કાશ્મીરમાં સેનાને મળી મોટી સફળતા, કુલગામમાં લશ્કર-એ-તૈયબાના 5 આતંકીઓના ઢીમ ઢાળી દેવાયા

કાશ્મીરના IGP વિધી કુમાર બિરદીએ કહ્યું કે, અત્યાર સુધીમાં પાંચ આતંકવાદીઓ માર્યા ગયા છે. ઓપરેશન હજુ ફાઈનલ સ્ટેજમાં છે. ગુરુવારથી કુલગામમાં સર્ચ ઓપરેશન ચાલી રહ્યું છે. આતંકવાદીઓ ભાગી ન જાય તે માટે આ વિસ્તારમાં ઘેરાબંધી સઘન કરી દેવામાં આવી છે. એવું માનવામાં આવે છે કે લશ્કર-એ-તૈયબાના બે સ્થાનિક અને એક વિદેશી આતંકવાદીને ઘેરી લેવામાં આવ્યા છે. જોકે, હજુ સુધી અધિકારીઓ તરફથી આની પુષ્ટિ કરવામાં આવી નથી.

કુલગામના આ વિસ્તારમાં ગુરુવારે રાત્રે તો શાંતિ રહી, પરંતુ શક્રવાર સવારથી જ ગોળીઓનો અવાજ સંભળાઈ રહ્યો છે. સેનાએ આ વિસ્તારને ઘેરી લીધો છે અને લોકોને અહીંથી દૂર રહેવા માટે કહેવામાં આવ્યું છે.

નોંધનીય છે કે, દક્ષિણ કાશ્મીરના કુલગામના ડીએચ પોરામાં સુરક્ષા દળોએ અત્યાર સુધીમાં પાંચ આતંકવાદીઓના ઢીમ ઢાળી દીધા છે. આ વિસ્તારમાં આતંકવાદીઓ છુપાયા હોવાની માહિતી મળ્યા બાદ ગઈકાલે બપોરે સેનાએ સર્ચ ઓપરેશન શરૂ કર્યું હતું. આ દરમિયાન સેનાના જવાનોએ આ વિસ્તારને ઘેરી લીધો હતો, પોતાને ઘેરાયેલા જોઈને આતંકવાદીઓએ અચાનક ફાયરિંગ શરૂ કરી દીધું હતું. જે બાદ જવાનોઓ પણ જડબાતોડ જવાબ આપ્યો.