કોચ્ચિની CUSAT યુનિવર્સિટીમાં મ્યુઝીક કોન્સર્ટમાં ભાગદોડ, 4 વિદ્યાર્થીઓનાં મોત

સ્વાસ્થ્ય મંત્રી વીણા જ્યોર્જે કહ્યું કે, આ દુર્ઘટના નિખિતા ગાંધીના એક મ્યુઝિક કોન્સર્ટ દરમિયાન થઈ હતી. મળતી માહિતી અનુસાર, યુનિવર્સિટી કેમ્પસમાં ઓપન-એર ઓડિટોરિયમમાં મ્યુઝિક કોન્સર્ટનું આયોજન કરવામાં આવ્યું હતું. આરોગ્ય મંત્રીએ કહ્યું કે, ઘાયલોની સારવાર માટે કલામસેરી મેડિકલ કોલેજમાં વ્યવસ્થા કરવામાં આવી છે. નાસભાગમાં જીવ ગુમાવનારા ચાર વિદ્યાર્થીઓમાં 2 છોકરાઓ અને 2 છોકરીઓ છે. જ્યારે બે વિદ્યાર્થીનીઓની હાલત નાજુક હોવાનું સામે આવ્યું છે.

પ્રારંભિક વિશ્લેષણ મુજબ, જ્યારે વરસાદ શરૂ થયો, ત્યારે પાછળના વિદ્યાર્થીઓ આગળની તરફ દોડવા લાગ્યા. આ દરમિયાન નાસભાગ મચી ગઈ હતી. પરિસ્થિતિ કાબૂ બહાર ગઈ હતી. આ નાસભાગમાં 4 વિદ્યાર્થીઓનાં મોત નિપજ્યા હોવાની પ્રાથમિક માહિતી સામે આવી હતી.