ખેડામાં ખેતરમાંથી ગાંજાનો 550 કિલો ઊભો પાક મળ્યો, પોલીસ ઊંઘતી રહી ને SOG દરોડા પાડી ગઈ

આજુબાજુના ખેતરોમાંથી મજૂરોની મદદ લેવી પડી
ખેડા જિલ્લા એસ.ઓ.જી પોલીસે બાતમીના આધારે કપડવંજના ભુતીયા ગામે કૃપાજીના મુવાડામાંથી અલગ અલગ બે સર્વે નંબરના મોનાભાઈ સોમાભાઈ ઝાલા અને શંકરભાઈ સોમાભાઈ ઝાલાના ખેતરમાં દરોડો પાડયો હતો. ખેતરમાંથી ગાંજાનો ઉભો પાક ઝડપી પાડ્યો. આટલી મોટી માત્રામાં ગાંજો જોઈને એસ.ઓ.જી પોલીસ પણ ચોંકી ઉઠી હતી. મોટી માત્રામાં ગાંજાનો ઉભો પાક કાપવા આજુબાજુના ખેતરના મજૂરોની પોલીસે મદદ લીધી અને આસપાસના ખેતરના મજૂરો દ્વારા આ સમગ્ર ઉભા પાકને એકત્ર કરી કપડવંજ રૂલર પોલીસ સ્ટેશનમાં લાવવામાં આવ્યો.

55 લાખનો 550 કિલો ગાંજો મળ્યો
મહત્વની વાત કરવામાં આવે તો કપડવંજ પોલીસ ઊંઘતી રહી અને ખેડા એસોજીએ પોતાનું ઓપરેશન પાર પાડ્યું. પોલીસે ઉભા પાકને એકત્ર કર્યા બાદ જ્યારે તેનુ વજન કર્યું તો આશરે 550 કિલો જેટલો ગાંજો જેની મૂળ કિંમત 54,98,000 જેટલી થાય છે. આ મુદ્દા માલ સાથે ખેતર માલિક માનસિંહ સોમાભાઈ ઝાલાને પણ પોલીસે ઝડપી પાડ્યો હતો. જ્યારે અન્ય એક ખેતર માલિક શંકરભાઈ સોમાભાઈ ઝાલાને પકડવા માટે પોલીસે ચક્રો ગતિમાન કર્યા છે. હાલતો એસ.ઓ.જી પોલીસ દ્વારા સમગ્ર મુદ્દા માલને સીલ કરી વધુ કાર્યવાહી હાથ ધરવામાં આવી છે.