બનાસકાંઠા: મેળામાં ઘુસેલી રાજસ્થાની ટોળકીએ સરપંચના પુત્રને દોડાવી-દોડાવીને માર્યો, લૂંટીને ખેતરમાં ફેંકી દીધો

60થી 70 લોકોનું ટોળું હથિયારો સાથે ઘુસી આવ્યું
ઘટના મુજબ, બનાસકાંઠાના અમીરગઢ પાસે વિશ્વેશ્વર મહાદેવ મંદિરમાં શિવરાત્રીનો મેળો ભરાય છે. આ વર્ષે પણ મેળો યોજાયો હતો. જેમાં અમીરગઢના ખુનીયાગામના સરપંચનો પુત્ર પંકજ પણ પહોંચ્યો હતો. દરમિયાન રાજસ્થાની ગેંગના 60થી 70 લોકોનું ટોળું હથિયારો સાથે ત્યાં પહોંચ્યું અને પંકજ પાસેથી બાઈક અને મોબાઈલની માગણી કરી હતી. જોકે પંકજે તે આપવાની ના પાડતા ટોળું તેના પર હથિયારો સાથે તૂટી પડ્યું હતું અને મારી મારીને પંકજને અધમૂઓ કરી નાખ્યો હતો.

આ પણ વાંચો: રાત્રે રૂમમાં સૂવા ગયેલી યુવતીનો સવારે ઘર પાછળ તળાવમાંથી મૃતદેહ મળ્યો, 4 દિવસ પછી લગ્ન હતા

મોબાઈલમાં કેદ થઈ ગઈ મારામારીની ઘટના
સમગ્ર ઘટના કોઈએ મોબાઈલમાં રેકોર્ડ કરી લીધી હતી. જેમાં દેખાય છે કે, એક ટોળું યુવક પાછળ પડ્યું છે. યુવક મારથી બચવા માટે ભાગવાનો પ્રયાસ કરે છે પરંતુ ટોળકી તેની પાછળ દોડીને માર મારી રહી છે.

યુવકે મારીને લૂંટી લીધો પછી ફેંકી દીધો
ટોળું આટલેથી ન ધરાયું અને યુવકને મેળાની બાજુમાં અન્ય જગ્યાએ લઈ જઈને ત્યાં પણ માર માર્યો હતો અને તે મરી ગયો એમ સમજીને તેની પાસેથી રોકડ રકમ અને મોબાઈલ ફોન લઈને ફરાર થઈ ગયું હતું. સમગ્ર ઘટનાને લઈને હાલમાં તો સરપંચના પુત્રને હોસ્પિટલમાં સારવાર માટે એડમિટ કરવામાં આવ્યો છે. જોકે પરિવાર દીકરો સાજો થઈ જાય તે પછી પોલીસ ફરિયાદ કરવા જશે.