Rajya Sabha Election: ગુજરાતથી રાજ્યસભાના ઉમેદવાર ગોવિંદ ધોળકિયા છે 279 કરોડના માલિક, જે.પી નડ્ડા પાસે કેટલી છે સંપત્તિ?

સમાચાર હાઇલાઇટ્સ

ગોવિંદ ધોળકિયા પાસે 279 કરોડની સંપત્તિ

ચાર ઉમેદવારોમાંથી સૌથી ધનિક છે ધોળકિયા

ધોળકિયા સામે નથી નોંધાયેલો એકપણ કેસ

Rajya Sabha Election: હીરાના ઉદ્યોગપતિ ગોવિંદ ધોળકિયા (Govind Dholakia) કુલ 279 કરોડની સંપત્તિ સાથે ગુરુવારે ગુજરાતમાંથી રાજ્યસભાની ચૂંટણી માટે ઉમેદવારી નોંધાવનાર ભારતીય જના પાર્ટી (BJP)ના ચાર ઉમેદવારોમાંથી સૌથી ધનિક છે. ભાજપના રાષ્ટ્રીય અધ્યક્ષ અને રાજ્યસભાના ઉમેદવાર જે.પી નડ્ડાની પાસે 9.36 કરોડ રૂપિયાની સંપત્તિ છે, જે તેમના ચૂંટણી એફિડેવિટમાં જાહેર કરવામાં આવી છે.

ચારેય નેતા સામે નથી એક પણ કેસ

શાસક પક્ષે 27 ફેબ્રુઆરીએ યોજાનારી ચૂંટણી માટે જે.પી નડ્ડા અને ગોવિંદ ધોળકિયા ઉપરાંત જસવંતસિંહ પરમાર અને મયંક નાયકને ચૂંટણીના મેદાનમાં ઉતાર્યા છે. સોગંદનામા મુજબ, ચારેય ઉમેદવારોમાંથી કોઈની સામે કોઈ એફઆઈઆર નોંધાયેલ નથી, ન તો તેઓ કોઈ ફોજદારી કેસનો સામનો કરી રહ્યા છે.

જે.પી નડ્ડા પાસે છે કુલ 9.36 કરોડ રૂપિયાની સંપત્તિ

ચૂંટણી એફિડેવિટ સાથે જોડાયેલ 2022-23 માટેના આવકવેરા રિટર્ન મુજબ, જે.પી નડ્ડાની વાર્ષિક આવક 24.92 લાખ રૂપિયા હતી, જ્યારે તેમની પત્ની મલ્લિકાની આ જ સમયગાળા દરમિયાન આવક 5.26 લાખ રૂપિયા હતી. એફિડેવિટમાં જણાવવામાં આવ્યું છે કે આ દંપતી પાસે કુલ 9.36 કરોડ રૂપિયાની સંપત્તિ છે. ભાજપ અધ્યક્ષની શૈક્ષણિક લાયકાત BA અને LLB છે.

ધોરણ 6 પાસ છે ગોવિંદ ધોળકિયા

સુરતના હીરાના વેપારી ગોવિંદ ધોળકિયા શ્રી રામકૃષ્ણ એક્સપોર્ટ્સના સ્થાપક અને ચેરમેન છે. તેમના એફિડેવિટમાં જણાવાયું છે કે તેઓ ધોરણ 6 પાસ છે અને 2022-23માં તેમની આવક 35.24 કરોડ રૂપિયા હતી, જ્યારે તેમની પત્નીની આવક 3.47 કરોડ રૂપિયા હતી. જસવંતસિંહ પાસે કરોડોની સંપતિ છે. ઉમેદવારીપત્ર ભરતા સમયે રજૂ કરેલ સોગંદનામા અનુસાર, જસંવતસિંહે 1 કરોડથી વધુનો આવકવેરો ભર્યો છે. તેમની પાસે પજેરો, મારુતિ કાર છે. તો તેમના પત્નિ પાસે નિશાન, ઓડી જેવી મોંધીદાટ કાર છે. ભાજપના બક્ષીપંચ મોરચાના પ્રમુખ મયંક નાયક 11 કરોડની સંપતિના માલિક છે. તેમના નામે ફોરચ્યુનર અને થાર એમ બે કાર છે તો તેમના પત્નિના નામે કોઈ વાહન નથી.

27 ફેબ્રુઆરીએ યોજાવાની છે રાજ્યસભાની ચૂંટણી

તમને જણાવી દઈએ કે રાજ્યસભાની ચૂંટણી 27 ફેબ્રુઆરીએ યોજાવાની છે. તે પહેલા ભાજપના રાષ્ટ્રીય અધ્યક્ષ જેપી નડ્ડા, જસવંતસિંહ પરમાર, મયંક નાયક અને હીરા ઉદ્યોગપતિ ગોવિંદ ધોળકિયાએ ઉમેદવારી નોંધાવી છે. આ ચારેય ઉમેદવારોના દસ્તાવેજો રિટર્નિંગ ઓફિસર રીટા મહેતાએ સ્વીકાર્યા છે. ઉલ્લેખનીય છે કે મનસુખ માંડવિયા અને પુરુષોત્તમ રૂપાલાની રાજ્યસભાનો કાર્યકાળ પૂર્ણ થઈ ગયો છે. આ વખતે તેમને ફરીથી ઉમેદવાર બનાવવામાં આવ્યા નથી.