IPL: ગુજરાત ટાઈટન્સ ફરી એકવાર જીતતા જીતતા હાર્યું, હેટમાયર-સેમસનની વિસ્ફોટક ઈનિંગ્સ, RRની 3 વિકેટે જીત

અમદાવાદ: નરેન્દ્ર મોદી સ્ટેડિયમમાં રમાતી ગુજરાત ટાઈટન્સ અને રાજસ્થાન રોયલ્સ વચ્ચેની મેચમાં રાજસ્થાનનો 3 વિકેટે વિજય થયો છે. ગુજરાત ટાઈટન્સે 20 ઓવરમાં 177 રન બનાવીને રાજસ્થાનને 178 રનનો ટાર્ગેટ આપ્યો હતો. જે તેણે 19.2 ઓવરમાં 7 વિકેટ ગુમાવીને હાંસેલ કરી લીધો હતો. અંતિમ ઓવર સુધી ચાલેલી રોમાચંક મેચમાં અંતિમ ઓવરમાં હેટમાયરે સિક્સ ફટકારી ટીમને જીત અપાવી હતી. આ સાથે જ પોઈન્ટસ ટેબલ પર રાજસ્થાન રોયલ્સે 8 પોઈન્ટ સાથે પોતાનું નંબર.1નું સ્થાન વધુ મજબૂત કરી દીધું છે.

મેચમાં ટોસ જીતને રાજસ્થાનની ટીમે પ્રથમ બોલિંગનો નિર્ણય કર્યો હતો. જેમાં ગુજરાતની ટીમે 20 ઓવરમાં 177 રન બનાવ્યા હતા. જવાબમાં રાજસ્થાન રોયલ્સની શરૂઆત ખરાબ રહી હતી અને બીજી જ ઓવરમાં યશસ્વી જયસ્વાલની વિકેટ ગુમાવી દીધી હતી. જયસ્વાલ ગુજરાતના કેપ્ટન હાર્દિકના બોલ પર શુભમન ગિલના હાથે કેચ આઉટ થયો હતો. આગલી ઓવરમાં રાજસ્થાને શમીના હાથે બોલ્ડ થયેલા જોસ બટલરની વિકેટ પણ ગુમાવી દીધી હતી. ત્રીજા નંબર પર બેટિંગ કરવા ઉતરેલ દેવદત્ત પડિકલે કેટલાક વિસ્ફોટક શોટ ફટકાર્યા. જો કે, પડિક્કલની ઈનિંગ્સ વધુ ટકી ન હતી અને તે સ્પિનર ​​રાશિદ ખાનનો શિકાર બન્યો હતો.