કોંગ્રેસ અધ્યક્ષ પદની ચૂંટણીની તારીખ જાહેર, 17 ઓક્ટોબરે થશે મતદાન

કોંગ્રેસ અધ્યક્ષની ચૂંટણી માટે જાહેર કરાયેલા કાર્યક્રમ મુજબ હવે જાહેરનામું બહાર પાડ્યા બાદ 24 થી 30 સપ્ટેમ્બર સુધી ઉમેદવારી પત્ર ભરવાની પ્રક્રિયા ચાલશે. નામાંકન પરત ખેંચવાની છેલ્લી તારીખ 8 ઓક્ટોબર છે. એકથી વધુ ઉમેદવારોના કિસ્સામાં 17 ઓક્ટોબરે મતદાન થશે અને 19 ઓક્ટોબરે પરિણામ જાહેર કરવામાં આવશે.

વિવાદના ચકડોળે છે રાષ્ટ્રીય અધ્યક્ષનું પદ
દેશમાં કોંગ્રેસ સતત તૂટી રહી છે ત્યારે રાષ્ટ્રીય અધ્યક્ષ પદ પરથી ગાંધી પરિવારને દૂર રહેવા માટે સૂચનો મળ્યા છે. 1996 થી 1998 સીતારામ કેસરી કોંગ્રેસના અધ્યક્ષ બન્યા હતા. ત્યાર બાદ આ પદ પર ગાંધી પરિવારનું વર્ચસ્વ છે. 1998થી 2017 સુધી સોનિયા ગાંધી સતત કોંગ્રેસના અધ્યક્ષ તરીકે ચૂંટાયા. પરંતુ 2017 માં, સોનિયા ગાંધીએ તેમની ઉંમર અને પાર્ટીને યુવા નેતૃત્વની આવશ્યકતા દર્શાવીને આ પદ છોડ્યું હતું. સોનિયા ગાંધીનું પદ છોડ્યા બાદ રાહુલ ગાંધીને કોંગ્રેસ અધ્યક્ષ બનાવવામાં આવ્યા.

રાહુલ ગાંધી 2017 થી 2019 દરમિયાન કોંગ્રેસના અધ્યક્ષ હતા, પરંતુ 2019 ની લોકસભાની ચૂંટણીમાં કારમી હાર બાદ રાહુલે હારની જવાબદારી લીધી અને કોંગ્રેસ અધ્યક્ષ પદ છોડ્યું. રાહુલ ગાંધીએ પદ છોડ્યા પછી, સોનિયા ગાંધીને 2019 માં ફરી એક વર્ષ માટે પાર્ટીના વચગાળાના અધ્યક્ષ બનાવવામાં આવ્યા હતા.