પાકિસ્તાની હિન્દુઓ માટે મોદી સરકારનો મોટો નિર્ણય, જાણો કેમ બન્યું ચર્ચાનું કેન્દ્ર…

નરેન્દ્ર મોદી સરકારની સ્પોન્સરશિપ પોલિસીમાં સુધારા પછી આ પહેલો પ્રસંગ હશે જ્યારે 426 પાકિસ્તાની હિન્દુઓની અસ્થિઓને તેમના પરિવારના સભ્યો હરિદ્વારમાં ગંગા નદીમાં વિસર્જિત કરશે. હાલમાં આ અસ્થિઓ કરાચી અને અન્ય સ્થળોએ કેટલાક મંદિરો અને સ્મશાનભૂમિમાં રાખવામાં આવી છે.

હિન્દુ ધર્મમાં કોઈપણ વ્યક્તિના મૃત્યુ પછી, ગંગા નદીમાં તેના અસ્થિ વિસર્જન કરવું સારું માનવામાં આવે છે. હિંદુ માન્યતાઓ અનુસાર, જો ભસ્મને હરિદ્વારમાં વિસર્જિત કરવામાં આવે છે, તો આમ કરવાથી તેમની આત્માને સ્વર્ગમાં જવાનો માર્ગ મળે છે અને તેઓ પુનર્જન્મથી પણ બચી જાય છે.

પાકિસ્તાની હિન્દુઓને મળશે 10 દિવસના વિઝા!
અત્યારસુધી જો કોઈ પાકિસ્તાની હિંદુને ભારત આવવું હોય તો તેને સ્પોન્સરશિપ વિના આવવા દેવામાં આવતા નહોતા. પરંતુ હવે નરેન્દ્ર મોદી સરકાર તે તમામ હિન્દુ પરિવારોને 10 દિવસ માટે ભારતીય વિઝા આપશે જેઓ તેમના પરિવારના સભ્યોની અસ્થિ ગંગા નદીમાં વિસર્જન કરવા માગે છે.વર્ષ 2011થી વર્ષ 2016 સુધીમાં વાઘા બોર્ડર પર 295 પાકિસ્તાની હિંદુઓના અસ્થિઓ ભારત મોકલવામાં આવ્યા હતા. પરંતુ આ પહેલીવાર હશે જ્યારે મૃતકના પરિવારનો કોઈ સભ્ય અસ્થિઓને હરિદ્વાર લઈ જશે.

અત્યાર સુધી માત્ર આશા હતી, હવે એ વાત સાચી થશે
મોટી સંખ્યામાં પાકિસ્તાની હિંદુઓ એવા હતા, જેમના મૃત્યુ પછી અંતિમ સંસ્કાર કરવામાં આવ્યા હતા. પરંતુ તેમના અસ્થિઓ મંદિરો કે સ્મશાનભૂમિમાં સુરક્ષિત રાખવામાં આવ્યા હતા. આ મૃતકોના પરિવારજનોને આશા હતી કે એક દિવસ તેઓ ચોક્કસપણે તેમના પ્રિયજનોની અસ્થિ સાથે હરિદ્વાર જઈ શકશે.

ભારત સરકારનો એવો કયો નિયમ છે, જેના કારણે અવરોધ ઊભો થાય છે?
ભારત સરકારની નીતિ અનુસાર, મૃતક પાકિસ્તાની હિન્દુના પરિવારના સભ્યને ત્યારે જ ભારત આવવા માટે વિઝા આપવામાં આવશે જ્યારે ભારતમાં રહેતા તેના સંબંધી અથવા નજીકના મિત્રમાંથી કોઈ તેને સ્પોન્સર કરે. આવી સ્થિતિમાં, એવા પાકિસ્તાની હિંદુઓ બહુ ઓછા છે, જેમના સંબંધીઓ અથવા નજીકના મિત્રો ભારતમાં રહે છે.

કરાચીના સોલ્જર બજાર સ્થિત શ્રી પંચમુખી હનુમાન મંદિરના સભ્ય રામનાથે જણાવ્યું કે આ કારણથી મંદિરોમાં સેંકડો લોકોની અસ્થિઓ રાખવામાં આવે છે. તેમના પરિવારોને આશા છે કે એક દિવસ આ અસ્થિઓ ચોક્કસપણે ગંગા નદીમાં વિસર્જન કરવામાં આવશે.

શ્રી રામનાથે કહ્યું કે આ મામલે પાકિસ્તાનમાં ભારતીય હાઈ કમિશનર સાથે લાંબા સમયથી વાતચીત ચાલી રહી હતી. હવે તેમના તરફથી અમને આ ખુશખબર આપવામાં આવી છે. શ્રી રામનાથે વધુમાં કહ્યું કે દરેક પાકિસ્તાની હિંદુને તેના લોકોની અંતિમ ઈચ્છા પૂરી કરવાનો અધિકાર છે. ભારતે પણ આનું સન્માન કરવું જોઈએ.