મેરી ક્રિસમસ 2022: નાતાલના દિવસની ઉજવણી ક્યારથી શરૂ થઈ? જાણો આ તહેવાર સાથેના રસપ્રદ કિસ્સાઓ..

ભગવાન ઇસુનો જન્મ..
ભગવાન ઇસુના જન્મની ખુશીમાં નાતાલનો તહેવાર ઉજવવામાં આવે છે. ભગવાન ઇસુ (ઇસુ ખ્રિસ્ત)ને ભગવાનનો પુત્ર કહેવામાં આવે છે. ખ્રિસ્તીઓની માન્યતા મુજબ ભગવાન ઇસુનો જન્મ 4 ઇ.સ.પૂર્વે થયો હતો. તેમના પિતાનું નામ યુસુફ અને માતાનું નામ મરિયમ હતું. ઇસુનો જન્મ એક ગૌશાળામાં થયો હતો, જેના પ્રથમ સમાચાર બધા ભરવાડોને મળ્યા હતા અને તે જ સમયે એક તારાએ ભગવાનના જન્મની ભવિષ્યવાણી સાચી કરી હતી.

ઈસુ માનવસેવામાં હતા…
ઈસુ 30 વર્ષની ઉંમરથી માનવ સેવામાં રોકાયેલા હતા. તે લોકોને સંદેશો આપતા ફરતા હતા. યહુદી ધર્મના કટ્ટરપંથીઓ ભગવાન ઈસુના આ પગલાથી નારાજ થઈ ગયા અને તેમનો વિરોધ કરવા લાગ્યા હતા. પછી એક દિવસ ભગવાન ઇસુને રોમન ગવર્નર સમક્ષ લાવવામાં આવ્યા અને પછી તેમને વધસ્તંભ પર ચડાવવામાં આવ્યા. માન્યતાઓ અનુસાર, વધસ્તંભ પર ચડ્યા પછી, ઇસુ ભગવાનના ચમત્કાર દ્વારા સજીવન થયા અને પછી તેમણે ખ્રિસ્તી ધર્મની સ્થાપના કરી.

ક્રિસમસ ડેની ઉજવણી ક્યારે શરૂ થઈ?
ખ્રિસ્તીઓના પવિત્ર પુસ્તક બાઈબલમાં ભગવાન ઈસુ ખ્રિસ્તની જન્મ તારીખ વિશે કોઈ સત્તાવાર માહિતી નથી. પરંતુ તેમ છતાં તેમનો જન્મદિવસ દર વર્ષે 25 ડિસેમ્બરે ઉજવવામાં આવે છે. 25 ડિસેમ્બરની તારીખને લઈને ઘણી વખત ઘણો વિવાદ થયો છે. રોમન કેલેન્ડર મુજબ, ઇ.સ. 336માં પ્રથમ વખત ઇસુનો જન્મદિવસ સત્તાવાર રીતે 25 ડિસેમ્બરે ઉજવવામાં આવ્યો હતો.

એવું કહેવાય છે કે ત્યારથી 25મી ડિસેમ્બરે ક્રિસમસની ઉજવણી થવા લાગી હતી. તે જ સમયે, એવું પણ કહેવાય છે કે ચોથી સદીના મધ્યમાં, પશ્ચિમી દેશોએ 25 ડિસેમ્બરને ક્રિસમસ ડે તરીકે માન્યતા આપી હતી. 1870માં, અમેરિકાએ સત્તાવાર રીતે ક્રિસમસ ડેને ફેડરલ હોલિડે તરીકે જાહેર કર્યો હતો.

ક્રિસમસ ટ્રીનો ઇતિહાસ
ક્રિસમસ ટ્રીની ઉત્પત્તિ હજારો વર્ષો પહેલા ઉત્તર યુરોપમાં થઈ હતી. તે સમયે ફર નામના વૃક્ષને શણગારીને આ તહેવાર ઉજવવામાં આવતો હતો. ધીમે ધીમે ક્રિસમસ ટ્રીનો ટ્રેન્ડ વધવા લાગ્યો. એવું પણ માનવામાં આવે છે કે ઈસુ ખ્રિસ્તના જન્મ સમયે, તમામ દેવતાઓએ સદાબહાર વૃક્ષને શણગાર્યું હતું. ત્યારથી આ વૃક્ષ ક્રિસમસ ટ્રી તરીકે ઓળખાવા લાગ્યું. ક્રિસમસ ટ્રીને ઘણી ભેટો, લાઇટ્સ, ચોકલેટ્સ અને બેલ સહિતની વસ્તુઓથી શણગારવામાં આવે છે.

સાન્તાક્લોઝની કહાની…
સાન્તા ક્લોઝ વિના નાતાલનો તહેવાર અધૂરો લાગે છે. સાંતા વિશે એક લોકપ્રિય વાર્તા અનુસાર, સંત નિકોલસનો જન્મ 6 ડિસેમ્બર, 340 ઈસ્વીસન પૂર્વેના દિવસે થયો હતો. એવું કહેવાય છે કે તેના માતા-પિતા બાળપણમાં જ ગુજરી ગયા હતા. મોટા થયા પછી, તે પાદરી બન્યા હતા. તેને લોકોને મદદ કરવાનું પસંદ હતું. એવું કહેવાય છે કે તે રાત્રે બાળકોને ભેટ આપતા હતા જેથી કોઈ તેમને જોઈ ન શકે. એવું માનવામાં આવે છે કે આ સંત નિકોલસ પછીથી સાન્તાક્લોઝ બન્યા હતા.

(DISCLAIMER: અહીં આપવામાં આવેલી માહિતી ધાર્મિક માન્યતાઓ પર આધારિત છે. Gujarat TAK તેના વિશે કંઈપણ પુષ્ટિ કરતું નથી.)