મહિસાગરમાં લગ્નના વરઘોડામાં સામેથી પૂરપાટ આવતી સ્વિફ્ટ ઘુસી ગઈ, ધ્રુજાવી મૂકે તેવા CCTV સામે આવ્યા

વરઘોડામાં મહેમાનો વચ્ચે પુરપાટ આવતી કાર ઘુસી
હાલ લગ્નસરાની મોસમ પૂરબહારમાં ચાલી રહી છે. ત્યારે બાલાસિનોરના દેવી પૂજક પરિવારમાં લગ્ન પ્રસંગ હતો. આથી ગત રાત્રે વરરાજાનો વરઘોડો બાલાસિનોર શહેરમાં નીકળ્યો હતો. એવામાં મુખ્ય રોડ પર રિલાયન્સ પેટ્રોલ પંપ પાસે ફૂલ સ્પીડમાં આવતી સ્વિફ્ટ કારના કાર ચાલકે વરઘોડામાં નાચતા મહેમાનોને અડફેટમાં લીધા હતા અને ગંભીર અકસ્માત સર્જ્યો હતો. આ અકસ્માતથી વરઘોડામાં અફરા તફરી મચી ગઇ હતી.

બાલાસિનોરમાં લગ્નના વરઘોડામાં અકસ્માત#Mahisagar જિલ્લાના બાલાસિનોરમાં ગઈકાલે નીકળેલા લગ્નના વરઘોડામાં નાચતા મહેમાનોને પુર ઝડપે આવતી સ્વીફ્ટ કારે અડફેટે લેતાં 1 મહિલાનું મોત, 25 લોકો ઈજાગ્રસ્ત થયાં છે. આ ઘટનાના સીસીટીવી સામે આવ્યા. #CCTVFootage #GTVideo #Accident pic.twitter.com/c34hCErSGV

— Gujarat Tak (@GujaratTak) February 16, 2023

અકસ્માતમાં 1 મહિલાનું મોત
આ ગમખ્વાર અકસ્માતમાં એક મહિલાનું મોત થયું હતું. તેમજ 20થી 25 જેટલા લોકો ઘાયલ થયા હતા. અકસ્માતની જાણ 108 એમ્બ્યુલન્સને થતા ઘટના સ્થળ પર વાન આવી ગઈ હતી. ઇજાગ્રસ્તોને હાલ તો બાલાસિનોરની કે.એમ.જી હોસ્પિટલમાં ખસેડવામાં આવ્યા છે. જ્યારે અન્ય સામાન્ય ઇજાગ્રસ્તને તેમના પરિવારજનો દ્વારા બાલાસિનોરની અલગ અલગ હોસ્પિટલમાં પહોંચ્યા હતા જ્યાં સારવાર લીધી હતી.

અકસ્માતમાં કાર ચાલક પણ ઈજાગ્રસ્ત
મહિસાગરના SP રાકેશ બારોટે જણાવ્યું હતું કે, ગઈકાલે રાત્રે 12.30 વાગ્યે વરઘોડો સેવાલિયા રોડથી પોતાના ઘર તરફ જઈ રહ્યો હતો. દરમિયાન બાલાસિનોર જતી કારે અકસ્માત કર્યો છે. જેમાં 25 જેટલા લોકોને ઈજા પહોંચી છે અને 1 વ્યક્તિનું મોત થયું છે. આ બાબતે ફરિયાદ નોંધવામાં આવી છે. વાહન ચાલકને પણ ઈજા પહોંચતા સારવાર માટે મોકલી આપવામાં આવ્યો છે.

તમારા વ્હોટ્સએપ પર વધારે સમાચારો અને બ્રેકિંગ ન્યૂઝ મેળવવા માટે ક્લિક કરો…