‘પાટલા ઘો જેવા, અમે કંટાળી જઈએ પણ…’- અબડાસામાં પ્રદ્યુમનસિંહ જાડેજા અંગે શું બોલ્યા ભુપેન્દ્ર પટેલ

બધા દેશોમાં માસ્ક છે, આપણે અહીં માસ્ક વગર બેઠા છીએઃ ભુપેન્દ્ર પટેલ
અબડાસામાં ભુપેન્દ્ર પટેલે કહ્યું કે, ધરતી કંપ આવ્યો ત્યારે બધાને હતું કે કચ્છનો વિકાસ કેવી રીતે થશે, પણ આપણે નરેન્દ્રભાઈની કાર્યપદ્ધતી જોઈ અને તેમણે જે આત્મનિર્ભરતાનો જે વિચાર આપ્યો છે તે સાકાર કચ્છમાં થયો છે. ફરીથી આ કચ્છ ગુજરાતના દરેક જિલ્લાની સાથે સાથે આગળ વધ્યું છે. ગુજરાત આજે દેશનું ગ્રોથ એન્જીન બન્યું છે.કોરોનામાં બધા દેશ થાકી ગયા પરંતુ નરેન્દ્ર મોદીએ ફ્રી વેક્સીનને કારણે આપણે તેમાંથી બહાર આવ્યા. આજે બધા દેશમાં માસ્ક ચાલું છે અને આપણે માસ્ક વગર બેઠા છીએ. કોરોના પછી ગુજરાત સરકારનું બજેટ અત્યાર સુધીનું સૌથી મોટું બજેટ આપણે આપ્યું છે. જેના ખાત મુહૂર્ત કર્યા છે તેમના લોકાર્પણ પણ અમે જ કર્યા છે. તમારા ત્યાં હજુ ઘણામાં બાકી છે અને તે લોકાર્પણ પણ અમારે જ કરવાના છે.

Live: કચ્છ જિલ્લાના અબડાસા વિધાનસભા મતક્ષેત્રમાં ભવ્ય રેલી અને જાહેરસભા https://t.co/FNoc8ix9Jx

— Bhupendra Patel (@Bhupendrapbjp) November 14, 2022

પ્રદ્યુમનભાઈ તમે જપ જો હોં…: CM
તેમણે હળવી મજાક કરતાં કહ્યું કે, અબડાસાની સીટ પર આપણા ઉમેદવાર આમ તો મોઢાથી ભોળા દેખાય છે પરંતુ કામ કઢાવવામાં પેલી પાટલા ઘો હોયને એમ અમારી સામે બેસી જાય છે અને આટલું તો કરવું જ પડશે. ઘણી વખત હું કંટાળી જાઉં કે હવે પ્રદ્યુમનભાઈ તમે જપ જો. બજેટમાં ખેંચ છે પણ ના ના આટલું તો કરી આપવું જ પડશે. હજુ તો બીજી બધી વાત તો મારે કહેવાય એવી નથી. એટલે જનતા માટે કામ કરવું તે પાર્ટીની કાર્યપદ્ધતિ રહી છે. હવે દરેક ક્ષેત્રે વિકાસની કક્કો બારાખડી શરૂ થાય તો પહેલો વિકાસનો ક એટલે કચ્છ થાય તેવો પાયો અહીં નખાઈ ગયો છે.