જૂનાગઢમાં બોગસ કોલ સેન્ટર પર દરોડા, ખેડૂતોને ફોન કરીને પડાવતા પૈસા; 5 મહિલા સહિત 11ની ધરપકડ

ખેડૂતે ફરિયાદ નોંધાવતા સાયબર સેલ એક્ટિવ

જામનગર સાયબર ક્રાઈમ સેલમાં એક ખેડૂતે છેતરપિંડીની ફરિયાદ નોંધાવી હતી, જે ફરિયાદના આધારે જામનગર સાયબરની ટુકડી હરકતમાં આવી હતી અને આ દિશામાં ટેકનિકલ એનાલિસિસ સોર્સિસથી તપાસ લંબાવી હતા.

બાતમીના આધારે પાડ્યો દરોડો

આ દરમિયાન યોગ્ય બાતમીના આધારે જૂનાગઢ શહેરમાં ચાલતા બોગસ કોલ સેન્ટર પર જામનગર સાયબર ક્રાઈમ સેલે દરોડો પાડ્યો હતો અને જૂનાગઢની 5 મહિલા સહિત 11ની ટોળકીને ઝડપી લીધી હતી. સાથે જ ટીમે મોબાઈલ ફોન્સ, લેપટોપ્સ સહિતનો મુદ્દામાલ કબ્જે કર્યો હતો.

ખેડૂતો સાથે આચરી છેતરપિંડી

સાયબર ક્રાઈમ સેલની પ્રાથમિક તપાસમાં સામે આવ્યું છે કે આ તમામ તાલપત્રી અને દવાની એજન્સી આપવાના બહાને ખેડૂતો સાથે છેતરપિંડી આચરતા હતા. આ તમામ ખેડૂતોને ફોન કરીને એજન્સીના બહાને ટાર્ગેટ કરતા હતા. પ્રાથમિક તપાસમાં સૌરાષ્ટ્રના કેટલાક ખેડૂતોને વિશ્વાસમાં લઈને લાખો રૂપિયા પડાવવામાં આવ્યા હોવાનું જાણવા મળ્યું છે. હાલ જામનગર સાયબર ક્રાઈમ સેલની ટીમ દ્વારા આ તમામની પૂછપરછ કરવામાં આવી રહી છે.

With Input: દર્શન ઠક્કર