ચોટીલામાં રોપ-વેનો કોન્ટ્રાક્ટ ટેન્ડર વિના કેવી રીતે આપી દીધો? હાઈકોર્ટનો સરકારને સવાલ

2008થી એક જ કંપનીને મળે છે કોન્ટ્રાક્ટ
હાઈકોર્ટમાં અરજદારના વકીલે રજૂઆત કરી કે, મોરબી ઝુલતા પુલની દુર્ઘટનામાં જે ભૂલ કરાઈ તેવી જ ભૂલ ચોટીલા મંદિરમાં બનતા રોપ-વેના પ્રોજેક્ટમાં કરાઈ રહી છે. સરકારે એવી કંપનીને રૂ.500 કરોડનો કોન્ટ્રાક્ટ આપ્યો છે જેને રોપ-વે બનાવવાનો કોઈ અનુભવ જ નથી. જો આ કોન્ટ્રાક્ટ માર્સ એન્ટરટેઈનમેન્ટ પ્રાઈવેટ લિ.ને અપાશે તો અસંખ્ય લોકોના જીવ જોખમમાં મૂકાશે. 2008થી સરકાર આ કંપનીને રોપ-વે બનાવવાનો કોન્ટ્રાક્ટ આપ્યો છે. જેની સામે હાઈકોર્ટમાં અરજી થઈ હતી અને 2011માં સરકારે જવાબ આપ્યો હતો કે કંપની લેટેસ્ટ ટેકનોલોજીથી રોપ-વેનું નિર્માણ કરશે.

10 વર્ષ જૂની ટેકનોલોજી વાપરે છે કંપની
રજૂઆતમાં આગળ કહેવાયું કે, કંપનીએ દસ વર્ષ બાદ આ ટેકનોલોજી અપનાવી છે. જે હવે જૂની થઈ ગઈ છે. છેલ્લા પંદર વર્ષથી સરકાર આ કંપનીને સમર્થન આપી રહી છે અને કોઈ હરાજી કે ટેન્ડર વિના જ કંપનીને કોન્ટ્રાક્ટ આપી દીધો છે. સરકારની પ્રક્રિયામાં પારદર્શિતા નથી. ખંડપીઠે આ મામલે વધુ સુનાવણી આગામી 16મી ફેબ્રુઆરીએ રાખી છે.