શામળાજીથી પોલીસે બે રેડમાં પકડ્યો 17 લાખનો મુદ્દામાલઃ 31 ડિસેમ્બર પહેલા બુટલેગરોની તૈયારી ફેલ

પ્રથમ ઘટના
વાત કરીએ તો શામળાજીના અસોલ ચેક પોસ્ટ પરથી આજે પોલીસે એક ટ્રકમાંથી ચપ્પલોના પાર્સલની આડસમાં વિદેશી દારુનો જથ્થો લઈ જતો ઝડપી પાડ્યો છે. પોલીસે ટ્રકમાં તપાસ કરી તો તેમાં ચપ્પલોના પાર્સલની આડસ વચ્ચે કુલ વિદેશી દારુની 1044 બોટલ મળી આવી હતી. જેની અંદાજીત બજાર કિંમત 5,06,040 થવા જતી હતી. પોલીસે ટ્રક સહિતનો મુદ્દા માલ મળી કુલ રૂપિયા 11,10,040ની મત્તા જપ્ત કરી હતી. પોલીસે આ ઘટનામાં એક આરોપીની ધરપકડ પણ કરી હતી.

બીજી ઘટના
બીજી ઘટનામાં શામળાજી પોલીસે અંગ્રેજી દારુ કારમાં ભરીને ગુજરાતમાં પ્રવેશવા માગતા એક દંપતિને ઝડપી પાડ્યું હતું. અમદાવાદના નારોલ વિસ્તારમાં રહેતું આ દંપતિ અંગ્રેજી દારુ કારમાં મોટી માત્રામાં ભરીને આવી રહ્યું હતું. પોલીસે કારમાંથી કુલ 504 જેટલી બોટલ વિદેશી દારુની જપ્ત કરી હતી. સાથે જ અંગ્રેજી દારુ ઉપરાંત કાર પણ જપ્ત કરી કુલ રૂપિયા 6,02,880નો મુદ્દામાંલ જપ્ત કર્યો હતો. પોલીસે જ્યારે પુછપરછ કરી ત્યારે અમદાવાદના આ દંપતીએ પોતાનું નામ જીતેન્દ્ર ધોબી અન તેની પત્ની સુસ્મિતા ધોબી હોવાનું કહ્યું હતું. પોલીસે બંનેની ધરપકડ કરીને વધુ કાર્યવાહી હાથ ધરી છે.