કોંગ્રેસમાં આંતરિક વિવાદ સતત વધ્યો, જુનાગઢમાં પાર્ટીના જ ધારાસભ્ય વિરૂદ્ધ લાગ્યા નારા

મા કે દ્વાર રેલી જુનાગઢ પહોંચતા થયો હોબાળો!
કોંગ્રેસની મા કે દ્વાર યાત્રા જ્યારે જુનાગઢ પહોંચી ત્યારે આંતરિક વિવાદ સામે આવ્યો હતો. એક બાજુ અહીં કેન્દ્રીય અને રાજ્યના દિગ્ગજ નેતાઓનું સ્વાગત કરાઈ રહ્યું હતું. જ્યારે બીજી બાજુ જુનાગઢના કાળવા ચોક પાસેથી કોંગ્રેસના કાર્યકર્તાઓએ પાર્ટીના જ ધારાસભ્ય ભીખાભાઈ જોશી વિરૂદ્ધ સૂત્રોચ્ચાર કર્યા હતા. આ દરમિયાન મામલો થાળે ન પડતા અન્ય દિગ્ગજો શાંત કરવા માટે મેદાનમાં આવ્યા હતા.

દલિત સમાજની નારજગી દૂર કરવા દિગ્ગજોએ કરી પહેલ
ઉલ્લેખનીય છે કે દલિત સમાજ નારાજ હોવાનું સામે આવ્યું છે. ત્યારે ભીખા ભાઈ જોશી વિરૂદ્ધ સૂત્રોચ્ચાર વધી જતા કોંગ્રેસના દિગ્ગજોએ શાંતિ જળવાઈ રહે તે માટે મેદાનમાં આવવું પડ્યું હતું. આ દરમિયાન અમરીશ ડેર, લલિત વસોયા, લલિત કગથરા સહિતના દિગ્ગજ નેતાઓએ સૂત્રોચ્ચારને બંધ કરાવવા માટે સમજાવવાનું શરૂ કર્યું હતું. ત્યારપછી તેમણે મહામહેનતે આ વિવાદ થાળે પાડવાની તજવીજ શરૂ કરી હતી.

દલિત સમાજના નેતા રાજુ સોલંકીએ કહ્યું કે અમારા દલિત સમાજની માગણી છે કે તમે ભીખાભાઈ જોશીને ટિકિટ ન આપો. એણે કોર્પોરેશનની ચૂંટણીમાં અમારા દલિત નેતાને હરાવવાનું કામ કર્યું હતું. નોંધનીય છે કે દલિત સમાજની નારાજગી કોંગ્રેસના અન્ય નેતાઓએ દૂર કરી હતી. પરંતુ આ પ્રમાણેના વિરોધ ભવિષ્યમાં કોંગ્રેસ પાર્ટી માટે નુકસાનકારક નિવડી શકે છે.