એક તરફી પ્રેમમાં પાગલ સુરતના PIએ પરિણીતાનું જીવવું હરામ કર્યું, 10 અલગ ફોનથી મેસેજ-કોલ કરતો

પરિણીતા કોઈને સાથે વાત કરે તો તેમને પણ પરેશાન કરતો
સુરેન્દ્રનગર બી ડિવિઝન પોલીસ સ્ટેશનમાં એક પરિણીતાએ પોલીસ સામે જ ફરિયાદ નોંધાવી છે. મહિલાની ફરિયાદ મુજબ હાલ એક તરફી પ્રેમમાં પાગલ સુરતમાં PI તરીકે ફરજ બજાવતા એક પોલીસ કર્મીએ પોતાની સત્તાનો દુરુપયોગ કરીને પરિણીતાની કોલ ડીટેઈલ કઢાવી હતી. આ પરિણીતા જે કોઈની સાથે પણ વાત કરે આ PI તેમને ફોન અને બિભત્સ મેસેજ કરીને પરેશાન કરતો હતો. આટલું જ નહીં પરિણીતાના ફોટોને મોર્ફ કરી તેના બિભત્સ વીડિયો બનાવીને પરિણીતાના જેઠને પણ મોકલ્યા હોવાનો આક્ષેપ કરવામાં આવ્યો છે.

ઘરમાં જઈને પરિણીતાને લાફા મારી દીધા
પોતાની ફરિયાદમાં આ પરિણીત મહિલાએ આક્ષેપ કર્યો છે કે, 6 માસ પહેલા આ પીઆઈએ તેમના ડ્રાઈવર સાથે તેના ઘરે પહોંચ્યા હતા અને તેને લાફા ઝિંકી દીધા હતા. હાલમાં આ સમગ્ર મામલે સુરતના PI વિરુદ્ધ સુરેન્દ્રનગર બી ડિવિઝનમાં ફરિયાદ નોંધાતા ચકચાર મચી ગઈ છે. પોલીસ દ્વારા હાલમાં સુરતના આ PI તથા તેમના ડ્રાઈવર વિરુદ્ધ તપાસના આદેશ આપ્યા છે.

(વિથ ઈનપુટ: સાજીદ બેલિમ)