ચૂંટણી પહેલા Hardik Patelનો સ્વ પ્રચાર! વિરમગામમાં માત્ર હાર્દિકના ફોટોવાળા ચોપડાનું વિતરણ

હાર્દિકની તસવીર વાળા ચોપડાનું વિતરણ
હાર્દિક પટેલના પત્ની કિંજલ પટેલ દ્વારા વિરમગામના તાલુકાના વિઠ્ઠલાપુરા, અસલગામ અને સુરજગઢ સહિતના વિવિધ ગામોમાં પ્રાથમિક સ્કૂલોમાં ચોપડાનું વિતરણ કરવામાં આવ્યું હતું. જન સેવા ટ્રસ્ટના નામ હેઠળ બાળકોને આપવામાં આવતા આ ચોપડાઓ પર માત્ર હાર્દિક પટેલનો જ ફોટો છે. એવામાં માત્ર હાર્દિક પટેલનો પોતાનો પ્રચારને જોઈને વિરમગામ ભાજપના નેતાઓમાં ચર્ચાનો વિષય બન્યો છે. જ્યારે ભાજપના કોઈ નેતા, PM મોદી કે પછી ભાજપના ચિહ્નનો પણ તેમાં ઉલ્લેખ નહોતો જોવા મળ્યો.

આજે વિરમગામ તાલુકાના નળકાંઠા વિસ્તારના અસલગામ અને સુરજગઢ ગામ ખાતે પ્રાથમિક શાળાઓમાં નોટબુક અને ચોપડા વિતરણ કર્યું. ગામની બહેનો સાથે સરકારની વિવિધ યોજનાઓ બાબતે સંવાદ કર્યો. આપણા આવનાર ૨૫વર્ષનો આ અમૃતકાળ દરેક વિરમગામવાસીઓ માટે કર્તવ્યકાળ સમાન છે. pic.twitter.com/32Ur5FMe5t

— Kinjal Hardik Patel (@RealKinjalPatel) August 30, 2022

ગામે-ગામ જઈ હાર્દિક પટેલની વિવિધ કાર્યક્રમોમાં હાજરી
વિરમગામની વિધાનસભા બેઠક પરથી ભાજપ આ વખતે હાર્દિક પટેલને ટિકિટ આપશે કે અન્ય કોઈ ઉમેદવારને તક મળશે તે હજુ સ્પષ્ટ નથી. પરંતુ ચૂંટણી પહેલા જ વિરમગામમાં હાર્દિક પટેલ તથા તેમના પત્ની કિંજલ પટેલ ગામે ગામ જઈને વિવિધ સામાજિક અને ધાર્મિક કાર્યક્રમોમાં હાજરી આપીને પોતાનું કદ વધુને વધુ મજબૂત કરી રહ્યા હોય તેમ સ્પષ્ટ લાગી રહ્યું છે. જોકે તેમના કાર્યક્રમમાં ભાજપ નેતાઓની ગેરહાજરી જોવા મળતી હોય છે.

તાજેતરમાં જ ભાજપમાં જોડાયા છે હાર્દિક પટેલ
ગુજરાતમાં ચૂંટણીને હવે થોડા દિવસોની જ વાર છે. ત્યારે હાર્દિક પટેલે થોડા મહિના અગાઉ જ કોંગ્રેસમાંથી રાજીનામું આપીને ભાજપમાં જોડાઈ ગયા હતા. જોકે આગામી ચૂંટણીમાં ભાજપ તેમને ટિકિટ આપશે કે નહીં તે તો માત્ર સમય જ બતાવશે.