આમા કેવી રીતે ભણે ગુજરાત? સરકારી કોલેજમાં ચાલુ પરીક્ષાએ સરકારની ‘વિશ્વાસથી વિકાસ યાત્રા’ યોજાઈ

પરીક્ષા હોવાની જાણ કરાઈ છતાં કાર્યક્રમનું આયોજન
આ વિશે સિદ્ધપુરના પ્રાંત અધિકારી સંકેત પટેલે Gujarat Tak સાથે ટેલિફોનીક વાતચીતમાં જણાવ્યું કે, કાર્યક્રમ માટે અમારી ટીમ પહેલા કોલેજની મુકાલાતે ગઈ હતી. ત્યારે કોલેજ સંચાલક દ્વારા અમને જાણવામાં આવ્યું કે, બીજા માળની જગ્યાએ ત્રીજા માળે આવેલ હોલનો ઉપયોગ કરજો. જેથી વિદ્યાર્થીઓને કોઈ પ્રકારની સમસ્યા ઉભી ન થાય. ત્યાર બાદ અમે કોલેજને લેખિતમાં હોલને 1 કલાક માટે રિઝર્વ રાખવા સૂચના આપે હતી. તેમને આ કાર્યક્રમને લઇને એ પણ જણાવ્યું કે આ કાર્યક્રમ પરીક્ષા દરમ્યાન થયો તે યોગ્ય નથી. કારણ વિદ્યાર્થીઓના ભવિષ્યનો સવાલ હતો. પરંતુ અમારી પાસે કોઈ વિકલ્પ નહોતો જેના કારણે અમને કરવું પડ્યું.

સિદ્ધપુર નગરપાલિકાનો ઓડિટોરિયમ હોલ કેમ ન વપરાયો?
સિદ્ધપુર નગરપાલિકાના ઓડીટોરીયમ હોલનો ઉપયોગ ન કરવા વિશે તેઓ બોલ્યા, નગરપાલિકાનો હોલ છે પણ અંબાજીના મેળાના કારણે પાલિકાનો સ્ટાફ ત્યાં હોવાથી અમને કોઈ પ્રકારની સગવડ મળી નહીં. એ હોલમાં છેલ્લા 5-6 મહિનાથી કોઈ કાર્યક્રમ થયો નથી એટલે સુવિધા પૂરી ન પાડી શકીએ પણ હવેથી આવા કોઈ પણ કાર્યક્રમ પાલિકાના ઓડીટોરિયમ હોલ ખાતે થાય એવા પ્રયત્ન કરીશું.

વિદ્યાર્થીઓના ભવિષ્યને નેવે મૂકી પોતાની વાહ વાહીમાં મસ્ત – ચંદનજી ઠાકોર
આ કાર્યક્રમની જાણ ચંદનજી ઠાકોરને થતા તેમને પણ આ કાર્યક્રમને ગેરવ્યાજબી જણાવ્યું, વિદ્યાર્થીઓની ચાલુ પરીક્ષા દરમ્યાન વિશ્વાસથી વિકાસનો કાર્યક્રમ ભાજપ દ્વારા કરવામાં આવ્યો. ભાજપના નેતાઓ વિદ્યાર્થીઓના ભવિષ્ય સાથે ચેડા કરે છે. જ્યારે સરકારને વિદ્યાર્થીઓની જગ્યાએ પોતાના કાર્યક્રમો થકી પ્રચારની વધુ ચિંતા છે.

કોલેજના સંચાલકે પણ કબૂલ્યું કાર્યક્રમથી વિદ્યાર્થીઓને ભણવામાં ખલેલ પડે છે
નર્સિંગ કોલેજના સંચાલક અમીબેને જણાવ્યું કે, પરીક્ષા દરમ્યાન વિશ્વાસથી વિકાસ યાત્રાનો કાર્યક્રમ જે થયો એનાથી અમારા વિદ્યાર્થીઓને પરીક્ષા દરમ્યાન થોડી અગવડતા રહી. આ કોલેજમાં દરેક સરકારી કાર્યક્રમો થાય છે જેનાથી ભણવામાં પણ ખલેલ પડતી હોય છે. 80 વિદ્યાર્થિનીઓ આ કોલેજમાં અભ્યાસ કરતી હોય તો આ કાર્યક્રમો સરકાર દ્વારા અન્ય સ્થળે યોજવામાં આવે તો સારું. અમે આજે પ્રાંત અધિકારીને આ બાબતે લેખિતમાં જાણ કરીશું.