ગઈ વખતે આખું સંગઠન હરાવવામાં પડેલું, તોય હરાવી શક્યા નહીં, આ વખતે પણ હું જ જીતીશ-BJP MLA

ચૂંટણી લડવા અને સંગઠન પર શું બોલ્યા મધુ શ્રીવાસ્તવ
મધુ શ્રીવાસ્તવે કહ્યું કે, આજે પણ અમે ચૂંટણી લડવાના, જીતવાના. ભાજપમાં છીએ, ભાજપમાં રહેવાના. ગઈ વખતે ચૂંટણી દરમિયાન આખું ભાજપનું સંગઠન અને બધા ટિકિટ માંગનારા વિરોધમાં હતા અને હરાવવામાં પડેલા. તોય મને હરાવી શક્યા નહીં ને 10 હજાર વોટથી જીતેલો. હવે તો બધા ભેગા થાય તો પણ 50 હજાર વોટથી જીતવાનો છું.

લોકશાહીમાં દરેકને ચૂંટણી લડવાનો હક
આ સાથે તેમણે ભાજપની સેન્સ લેવાની પ્રક્રિયા પર જણાવ્યું કે, લોકશાહીમાં દરેક વ્યક્તિને ચૂંટણી લડવાનો હક છે. જેથી વાઘોડિયા સીટ પર લોકો દાવેદારી કરી શકે, પરંતુ આ બેઠક પર જીત તો હું જ મેળવીશ.

6 ટર્મથી વાઘોડિયાના ધારાસભ્ય રહી ચૂક્યા
નોંધનીય છે કે, વાઘોડિયામાંથી 6 ટર્મથી ચૂંટણી લડીને જીતેલા ધારાસભ્ય મધુ શ્રીવાસ્તવ પોતાના દબંગ અંદાજ અને બાહુબલી મિજાજ માટે જાણીતા છે. તાજેતરમાં જ તેઓ વડોદરાની મુલાકાતે આવેલા કેન્દ્રિય ગૃહમંત્રી અમિત શાહને મળ્યા હતા. આ બાદ પણ તેમણે વાઘોડિયા બેઠક પરથી ચૂંટણી લડવાનો અને જીતવાનો દાવો કર્યો હતો.